kanada REklam

Una kantika sovre la unidad del puevlo Djudyo

Una kantika sovre la unidad del puevlo Djudyo

Mas de 100 partisipantes de Birthright fueron filmados en la realizasyon del klip, ke esta amostrando 30 ermozos lugares de Israel. El klip fue dirijido por Shilo Galai.

Este enverano alrededor de 32,000 mansevos estan vijitando Israel, i este klip fue produsido a la onor de Birthright Israel.

“Mansevos djudyos del mundo entero estan kantando todos endjuntos una kantika sovre la unidad del puevlo djudyo. Este enverano, estos mansevos estan eksperimentando Israel, i esto sigura, kuando van a arivar a sus kazas, esta kantika va ser sus mesaje” esta dizyendo Gidi Mark, direktora de Birthright.

“Esta kantika esta tokando al korason de muestra djente: todos los djudyos semos aunados. Kuando los djudyos del mundo entero la kantan endjuntos, mos esta dando un mesaje de esperansa ke mezmo ke tenemos diferensyas, tambien ya savemos ke semos aunados. La muzika es un arte internasyonal.  Estamos muy orgoyozos ke esta kantika ke eskrivimos, esta ayudando a trayer a Israel los mansevos de la Diaspora. Es muy emosyonante ke los mansevos ke vyenen a Israel kada anyo kon Birthright, estan puedyendo aunarsen kon los israelyanos i kon el payis a traves la muzika tambien” estan dizyendo Doron Medalie i Idan Raichel, los kreadores de la kantika orijinal.

“Partisipar a la realizasyon del video me dyo una idea de la kultura i de la tradisyon israelyana. Lo ke es lo mas importante es ke me izo sintir ke apartengo aki. “Aki ay un ogar, aki ay un korason”, “topi estas palavras muy emosionantes, i me estan atando a mi identidad djudiya” esta dizyendo Andy Bodian, partisipante de Birthright Israel de Long Island, New York.

Durante syete dekadas en mi koshe

Estuve konduizando, entremientes mirando a los leshos

Komo, el pasado rapidamente torna al prezente.

 

Por ensima de Masada, sale el sol

I una orasyon korye a Yerushalaim

De Kinneret i Achziv

Por selebrar Tel Aviv.

 

Mi padre dezeyo un pozo

Ke todos rankontramos en Israel.

I agora mi ijo me esta demandando,

Komo esta tierra salyo enmedyo?

 

Este es el ogar, este es el korason

Nunka estaremos separados,

Muestros padres son las raizes

Mozotros - las rozas, semos muzika nota por nota

Shevet achim ve’achayot.

La mezma kaye vyeja, el mezmo vizindado

Dodje ijos de Yaakov en sus kaminos

Endjuntos indo de lugar en lugar

En bushkida de lo ke van a enkontrar.

 

Un ombre reflekta la vizyon de su patriya

Gravando linyas de lo vyejo i lo muevo

Entre las promesas i las orasyones

Una aroma de narandjas i peras.

 

I en los ojos de mi madre veygo

Un lugar ke siempre es djusto para mi.

En la gitara uno esta djugando

Una kantika vyeja ke va giar mis kaminos.

 

Este es el ogar, este es el korason.

Nunka estaremos separados

Muestros padres son las raizes.

Mozotros - las rozas, somos muzika nota por nota.

Shevet achim ve’achayot

 

Del empesijo todo esta kuzido

Pedaso i pedaso la istoria esta konstruida

Dos palavras konektan i sinyifikan

Kon el ilo de oro de un poeta.

 

Agora apartenemos, semos famiya.

A todos mis amigos les digo: “Aki!”

Kon kada batida de mi korason en mi pecho

So del este, so del oeste.

 

Este es el ogar, este es el korason

Nunka estaremos separados

Muestros padres son las raizes

Mozotros - las rozas, semos muzika nota por nota

Shevet achim ve’achayot.

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın