Kaos en el trafik de las Islas

Judeo-Espanyol
17 Temmuz 2019 Çarşamba

Eliz Gatenyo

Ay unas kuantas islas en la mar de Marmara, donde las sinko son moradas, biven la djente i ay unas ke son deziertas. A estas islas puedemos ir solo kon vapores. I los vehikulos son defendidos de sirkular en estas islas. De sorte ke asta unos kuantos anyos antes aviya solo 3-4 otomobiles, ke eran ambulansa, etfaye (ke amata fuegos), uno para la polisiya i uno para arekojer esyerkol. Estas islas tienen munchas kolinas i por esto no es muy fasil de sirkular solo kon bisikletas. Ay talikas, faytones kon kavayos. Todo el transporte se aze kon estas talikas. Los ke moran en las islas o los ke vienen a vijitar la isla uzan estas talikas. Mizmo yevar merkansiyas a las botikas se azen kon arabas ke son travadas por los kavayos.   

Ma ay unos kuantos anyos ke ampesaron a vinir munchos turistos, seya de aryentro del payis o seya de afuera. En dizyendo “munchos” no esto egzajerando. Munchos kero dizir ke ay diyas ke no se puede mizmo pasar a traves de esta muchedumbre. Siguro ke la isla normalmente ke no es muy apuevlada, se satura. Mozotros los moradores ni ke abashamos al charshi las fin de semanas. En kurto, todos estos turistos keren azer el torno de la isla. Siguro kon las talikas, ke para eyos es nostaljiya. Los kocheros (arabadjis) para ganar mas muncho, se van presto presto i tornan presto, ansina azen unos tornos demaziya. Dizeremos azen yarish. Aparte ke es danjerozo para los ke se van a pye, los poveretos kavayos en vezes no pueden mas i se kayen, se mueren. Desparte de esto, los moradores no topan talikas por ke los kocheros no keren klientes ke moran serka, por ke kosta mas poko ke los tornos. Despues de munchas keshas muestras, apartaron una estasyon spesyala para los moradores.

En supito salyo un haber ke van a alevantar las talikas i van a meter minibuses ke lavoran kon elektrisita. No uvo nada. Mas despues ampeso a salir motosikletas kon elektrisita. Para estas motosikletas en empesijo aviya permisyon solo para los viejos i los hazinos. De diya en diya pujaron estas motosikletas i kaje kada famiya se merko una, siguro illegalamente. I las botikas se merkaron motosikletas ke tienen detras lugar para meter sus bienes. Estas motosikletas de las botikas son konduizadas por mansevikos ke les plaze prestes.

Aparte de esto todo, entre los turistos ke vienen, los mansevos alkilan bisikletas. Ay entre eyos ke no saven konduizar bien. En vezes se kayen, en vezes peryen el kamino.

Ya vos imajinash el kaos ke azen en las islas.

El problem es ke no se esta puedyendo topar una solüsyon apropriada. Porke las talikas dependen de la Munisipalita Metropolitana, las motosikletas dependen de la Direksyon de Trafiko. I la Munisipalitad de la Isla no tiene dingun poder para topar una solüsyon.

Esta kestion se puede resolvar kon una grande koordinasyon i una grande planifikasyon. Asperando estamos …

Siz de yorumunuzu yapın

Tüm Yorumları Görün