Una boda enteresante en Israel

Şeli GAON Judeo-Espanyol
31 Temmuz 2019 Çarşamba

La semana pasada estuve en Israel para un korte de mez de un kerido  byenfetor, İZAK PİNHAS ke mos desho la buena vida. Komo tenemos buenas relasyones kon su mujer, no la kijimos desharla sola i asistimos a los meldados.

Una buena koensidensya ke pude assistir a la boda del ijo de mi kerida prima. Una boda muy enteresante ke se realizo en un salon serka de Holon, kon una guerta grande, ermoza kon arvoles i flores de diferentes kolores.

La demanyana de la boda, la kaza de mi prima paresiya a un salon de kuaför. Dos mujeres una para peynar los kaveyos, azer fön, otra para azer makyaj vinyeron kon todos los utiles ke tyenen menester.

Komo eramos sinko mujeres mos sureyo buen karar de tyempo. Entremientes komo aviya trayido filas i borekitas de berendjena de Estambol, ize un sutlu börek kon las borekas i se chuparon los dedos…

A las syete salimos de kaza para ir a la boda. Una kalor a no pueder respirar, 45 grados hamsin. Los fostanes se apegaron a la espalda tanto sudimos. Enfin mos topimos kon los paryentes del novyo i de la novya i mos tomaron unas kuantas fotos kon las famiyas i los novyos.

En la guerta aviya mezikas en kada kanton i sirvideras para sirvir una koza diferente de komer. Falafel, karne, gayina, peshkado i en un kanton un bar para bevyendas. Todo estava muy savrozo i muy byen organizado. Despues ke se komyo un poko empeso una muzika.

Los mansevos no kijyeron tener relasyon kon el Rabanut, porke esta kitando munchas difikultades.

La ija de Yafa i Avraham Eliav,  SHİRAN kon el ijo de Lena i Shemtov Kalvo,  LİHAY se kazaron debasho la hupa sin Haham. El Haham fue Uri Shilo, un artisto konosido i muy simpatiko avlando komo un poeta. Los paryentes debasho la hupa i los novyos delantre de eyos.

Uri empeso a avlar kon rimas (kafiye), azyendo komo un stand-up, djusto lo ke se aze en una sinagoga, las orasyones, meter el aniyo de la novya al dedo, bever vino, romper el vazo i todas las tradisyones ke savemos, solamente kon munchos espris i antuzyasmo. La felisidad se estava vyendo de las karas de los envitados.

Despues ke se termino i todos felisitaron los novyos i sus famiyas, entrimos al salon de komer.

Afuera 45 grados, aryento -5 grados. Ya estash vyendo la diferensya de la kayentor? Atabafar i Entezar! Lo ke kale para hazineyar!

Enfin, kuando ya empeso el servis de komer ya estavamos artos. Shiran kon Lihay entraron kon una muzika spesyal i baylaron kon muncha armoniya.

El komer no se termino tanto aviya kozas.

Una muzika ke entretenyo a todo modo de edad. Todos baylando kon ardor i kon guste. Los mansevos, los grandes, las madres i los padres todos en medyo, unos kon los otros mizmo ke no eran konosidos. Todos alegres.

Despues de komer una meza grande de dulsuryas i para los mansevos sosises kon patatas fritas i bevyendas. Komer para patladear.

Salimos a las dos de la medya noche. Una boda muy byen organizada i muy reushida.

Lo ke es de arrogar es ke, los novyos seyan orozos fina 120 anyos, ke tengan byen i mozotros tambyen.

Syempre teneremos bodas i okazyones alegres para fyestar kon toda la famiya endjuntos. Porke la famiya es el konsepto el mas importante en el

Siz de yorumunuzu yapın

Tüm Yorumları Görün