En pasadas, una fotografiya en el Shalom de Julio 2019 me yevo a munchos anyos atras, ansi ke a la sivdad Petah Tikva de Israel.
Se trata de la fotografiya del kupl İzak & Fortüne Pinhas, ke konosi muy bien i de serka. Eran vizinos de mis djenitores i ansi durante mis viyajes a Israel, tuve la okazyon de konoserlos.
Mi padre ya lo konosiya al defunto desde su manseves, siendo ke eran de Çorlu.
No me akodro egzaktamente en ke anyo era kuando fue el “Hatan” de akel anyo, fuimos a vijitarlo a su kaza, ande enkontrimos mas ansianos Chorlulis.
Tanto avlar de Çorlu, me izo pensar a mi avuela paternal Nona Coya i a muestro chiko düello de palavras!
Mi Nona no avlava muncho, era seryoza i disiplinada. Oy en diya kuando me akodro de akeya epoka, me demando deke me aserkava de eya kon una sierta entravadura. Portanto, ya saviya ke me keriya bien siendo ke era la unika inyeta tradisyonalmente kon su nombre i alkunya.
Me akodro, yo apenas de 8-9 anyos, en arrekojyendo mi koraje le demandi: “Nona, me avlas un poko de Çorlu?” No me akodro de dingunos, de nada konsernando Çorlu”.
Apenas yo aviya terminado de avlar, akontesyo una koza inesparada (naturalmente tratandose de mi Nona). Me enkanti, no supe kualo pensar! Empeso a riir, a echar tarakas. Mi Nono, embabukado en su lektura abitual del Meam Loez, el tanbien alevanto la kavesa, kon enkanto i kuriozita. Mi Nona, kontente i oroza de la tempesta ke aviya solevantado, kedo mirandomos un syerto tyempo antes de responderme: “Komo te puedes akodrar hanuma miya? Tu no bivites nunka en Çorlu. No lo konosites afilu. Tu nasites en Estambol, te engrandesites en Estambol. Tu sos una ijika chika de Galata”.
Mi korason en revolta, mis ojos lagrimozos, koryi a tomar mi karta de identida. Vine delantre de mi avuela i kon el ayre de un komandante viktoryozo me aserki de eya:
“Mira Nona, mira aki esta eskrito Çorlu komo sivdad de mi nasimiento. Estas vyendo komo yo no so Estambolliya, so Çorluliya!”
Ma anyos despues kuando me ambezi la istorya de mis djenitores le di razon a mi Nona. Yo no konosi Çorlu, a lo menos, el Çorlu de akeya epoka.
