İsak Eskinazi
El nombre de Ashkelon viene de Shekel.
Shekel es el nombre de la moneda de Israel. La palavra shekel tiene mizma rais kon Lishkol, ke kere dizir Pezar.
Antes, el pagamiento de la merkansiya se aziya kon las kozas ke tenian el mizmo pezo. Por esta razon, algunos nombres de moneda son tambien nombres de pezo.
Drahma-Dirhem, Pound sinyifika i moneda, i pezo, (kaji medio kilo) Libra-Lira, Peso-Peseta viene de Pezar.
Asi Ashkelon era un sentro de merkar i vender, ande avia un komersyo importante. Si los arkeologos keren konoser un lugar para egzaminar la ekonomiya de la antiguedad, Ashkelon es el mijor lugar. En akeya epoka, Ashkelon tenia el mas grande puerto del mar Mediteraneo.
Aze 2700 anyos, Ashkelon tenia entre dodje mil i kinze mil abitantes ariento de las murayas. Kon lo poko ke Ashkelon tenia de tierra para arar i sembrar, era imposivle de mantener tanta djente. Ama Ashkelon savia azer komersio. Desgrasyadamente Ashkelon i Yerushalayim seran destruidos a la fin de la edad de fyerro por la nueva fuersa mundial, Babilonya.
Aze komo trenta anyos ke se izyeron ekskavasyones en Ashkelon i se enkontro un merkado paresido a los supermerkados de oy, i mos izo entender las aktividades ekonomikas del Medio Oriente. Los detayes ke fueron enkontrados mos ayudaron a konoser komo funksyonava un merkado en akeyas epokas. La forma de pensar ke antes no egzistiya era lo ke yamamos oy “girişimcilik”. I esto es: ser kapachi de empesar un lavoro muevo.
En Kanish, ke era un grande sentro de komersio de los Asirios, serka de Kayseri, fueron enkontradas algunas tavlias de barro. Kayseri tiene el mizmo nombre de Kisarya ke esta en Israel. Oy en diya los Kayserilis tambien se konosen muy harif por el alish-verish. En Kanish, los Asirios vendian tela para azer vestidos kontra el oro i plata ke venia de Bolkar, la montanya ke keda entre Mersin i Niğde, parte de las montanyas Toros Medianos. Estas montanyas tienen una altitud de 3.500 metros i son la kontinuasyon de los Alpes.
En las tavlias de barro meldamos sovre los impuestos, sovre las duanas, sovre la demanda i la oferta sovre el transporte i sovre las diferensyas de kosto i de presyo. Todos estos detayes mos azen pensar al komersyo de oy.
Dos barkos Fenisyos undidos serka de Ashkelon fueron deskuviertos en 1999. Estos dos barkos mos ensenyan la maestria de los Asiryos en tema de ‘Lojistik’, ke es la siensya de planifikar de la mijor manera. Eyos savian muy bien komo yenar el barko kon azete o vino sin ke se danyen. Konosian tanbien el ken dava el mijor presyo para vender la merkansiya al maz alto valor. Ezekhiel (27:5-7) mos dize ke de Tarshis (Tarsus) viene el fyerro, el teneke i estanyo (kalay) i el plomo. De Bet-Togarmah (Kapadosya) vienen los kavayos famozos i los aznos. Produktos komo trigo, miel, azete, vino, lana i mas i mas. Todo esto se va undir en el fondo del mar. (Profesia de Ezekhiel-27:27)
Por lo tanto ni los eskritos de los Asiryos, ni los barkos Fenisyos, ni la profesia de Ezekhiel, mos puede dar la figura ekonomika de estos tiempos. Despues de topar los pezos i las balansas en una sierta kaye, se supo ke ayi se pezava la plata para pagar los servisyos i la merkansiya. Los Profesores Mordehai Kislev i Ehud Weiss egzaminaron los granos de trigo de akeya epoka i supyeron ke el grano veniya de Ayifto. Aparte de los granos, se enkontro en el merkado, karne, pishkado, platos ande se komiya guevo kon pishkado, platos de seramika importados de Yavan. (Gresya). Asi kaji todo lo ke era nesesaryo por la vida de kada diya estava en el famozo merkado de Ashkelon. Un merkado ande se vendiya perakende i toptan en el mizmo lugar.
Todas estas kozas ke se enkontran en las ekskavasyones de los arkeologos mos dan una idea de komo bivia la djente i komo era la ekonomiya de akel tiempo.
La estreya de Ashkelon se apago kon la yegada de Nabuchadnezar.
Adaptado del artikolo eskrito por: D.M. Master i L.E. Stager
