kanada REklam

Primera mujer djudia a resivir el Nobel

Gerty Theresa RadnItz Cori

Primera mujer djudia  a resivir el Nobel

Gerty Theresa Radnitz Cori, la primera mujer djudia i la primera mujer amerikana a resivir el Premio Nobel (i la tresera mujer despues de Marie Curie i Irene Joliot-Curie), nasyo en Praga en el 15 Augusto de 1896. Su padre, Otto Radnitz, era un siantifiko ma desho la akademiya para ser jerente de una rafineriya de asukar. Su madre, Martha, era una mujer kulturalmente sofistikada i se topava en el anturaj de Franz Kafka. El “Gerty” en el nombre de Theresa no era una alkunya, sino ke eya fue nombrada en onor de un vapor de gerra austriako.

Gerty empeso sus estudiyos en kaza (home-schooling) antes de entrar a un lise de ijikas. Kuando tuvo 16 anyos eya desidyo ke se iva azer una doktora mediko. Kuando empeso a estudyar se apersivyo ke le mankava la konosensiya del Latin, fizika, shimi i matematika. En un anyo eya reusho a ambezarse el ekivalante del Latin ke se ambeza regularmente en 8 anyos, de la siensya en 5 anyos i de matematika en 5 anyos.

Su tiyo, un profesor de kriyaturas, la enkorajo a kontinuar sus estudios en una eskola de mediko. Lo ke eya izo i reusho a entrar a la eskola de medisina en la Universita Karl Ferdinand, en 1914. En akeyos tyempos para una mujer entrar i estudiar en una universidad de medisina era kaji inimajinavle.

En la Universidad enkontro a Carl Kori, i los dos se kazaron en 1920. Empesaron a morar en Vienna. Ma achakes del antisemitizmo montante i la situasyon ekonomika degradandose en la Austria,  en 1922 los dos immigraron a los Estados Unidos.

Arivando a la Amerika tuvyeron munchas difikultades porke akel tyempo mujeres ke keren lavorar no eran mirado kon buen ojo, i de mas las firmas i las universitas no estavan akseptando marido i mujer lavorando en el mizmo lugar.

En 1931 los dos fueron akseptados a la Universidad de Washington i ampesaron a las deskuvyertas en la medisina. En 1947 los dos, Gerty i Carl endjuntos, fueron koronados kon el premio de Nobel de Fizyolojiya i Medisina. Antes i despues de esta data los dos fueron koronados de munchos premios i titolos.

Lavorando muncho kon rontgenes i x-ray, en Gerty empeso la hazinura mala, la myelosklerosis.  I Gerty, despues de unos kuantos mezes perdyo la vida en 1957.

Despues de su muerte, para onorar esta mujer ke tuvo munchos deskuvyertos en la medisina, el movimyento de enerjia en el puerpo, desde los muskulos asta al ligado i el retorno al muskulo fue nomado Siklo de Cori, un krater en la Luna i en Venus tyene su nombre, el Krater de Cori.

 

 

 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın