Shofar

Eliz GATENYO Judeo-Espanyol
25 Eylül 2019 Çarşamba

En estos diyas santos, en Rosh Ashana i Kipur tenemos la okazyon de oyir el Shofar ke su boz mos emosyona muncho. Kualo es el Shofar? El shofar en realidad es un kuerno. Despues de munchos prosesos se vazya lo de aryentro, se alimpya, se aze briyante i se apronta para ke seya konvenivle a ser “tokado”.  El shofar no se “chufla”, se “toka”.  Agora vos kero eskrivir kualo semboliza el Shofar. Saadiah Gaon, un lider muy emportante del tiempo Medieval, mos eskrivio 10 enterpretasyones ke sembolizan el shofar.                                                                                                                                    

• 1- Koronasyon de un rey. El sonido del shofar parese a la boz de las trompetas ke anonsan la koronasyon de un Rey.

• 2- Ajita muestra konsyensya. Rosh Ashana es el empesijo de los 10 diyas de “Yamim Norayim”. La boz del Shofar mos aze pensar a lo ke pekimos el anyo entero, esperta muestra konsyensya i mos apareja a azer teshuva para ke el Dio, ke es perdonador, perdone muestros pekados.

• 3- Mos akodra la revelasyon del Sinai. Ansina mos akodramos ke devemos ser el puevlo de la Tora, estudiarla i pratikar sus mandamientos.

• 4- La emosyon de los Profetas. El sonido del Shofar mos akodra la emosyon de los profetas, sus bozes sonavan komo un shofar i denonsyavan a sus puevlos ke estavan en kamino yerrado i los yamavan al kamino de muestro Dio.

• 5- Mos akodra la destruksyon del Beit Hamikdash. El shofar mos akodra la destruksyon del Templo de Yerushalayim i mos yama a luchar para renovar Israel libero kon amor al Dio.

• 6- Semboliza el karnero ke Avraam sakrifiyo. El shofar ke es el kuerno de un karnero, mos akodra el karnero ke sakrifiko Avraam al lugar de su ijo Yitzhak. Ansina mos akodra tambien la fe de muestros padres, sus kreensyas en Dio.

• 7- Mos yama a la modestiya. El shofar mos yama a sintir la modestiya, la umildad delantre del poder del Dio, en todas las aksyones ke entornan  muestra vida.

• 8- Mos akodra el diya del juzgo. El shofar mos akodra el diya del juzgo dalkavo, yamando todo el puevlo i todas las nasyones para ke se aparejen para el egzamen de sus aktos.

• 9- Mos da haber de antes, el diya ke vamos a tornar  del egzilo. El retorno a la Tierra Santa de los ke estan en el egzilo i los ke no tienen techo para morar. Mos dize de akodrar i kreer en kada okazyon en la fondasyon de Israel.

• 10- El Shofar mos dize de meter fin a la ida de la vida en el mundo de asta agora i mos da haber de la vinida del Mashiah. Ke todos saveran ke el Dio es Uno i su nombre Uno tanbien.

El Shofar es tambien un simbolo. Si aboltash el shofar a su lado, puedesh ver el sinyo de enterogasyon. Su boz mos trava la atansyon i mos aze demandar la demanda la mas importante ke  kada uno lo interpreta asigun si mizmo.

Ke seyamos eskritos en los livros de la Vida i ke la boz del shofar yeve muestros dezeos a los sielos.

Siz de yorumunuzu yapın

Tüm Yorumları Görün