15 Temmuz 2020 Çarşamba 00:49

Kuando es Rosh Ashana

Judeo-Espanyol 1235 görüntüleme
2 Ekim 2019 Çarşamba

İSAK ESKİNAZİ

 

Kada anyada mueva es la puerta de un empesijo. Para las personas el anyo muevo es la sinyifikasyon de las muevas emosyones, muevos dezeos, muevos akontesimyentos.

Dingunos de mozotros no semos perfektos. Todos penamos kontinualmente para ser una persona mas buena. Unos de mozotros keren aflakarsen, otros no keren mas fumar, u el buto de otros es avansar moneda. Ken de mozotros keren ser mas pasensyozos, otros mas ordenados, otros tolerentes...

Bueno, para empesar a trokar deke eskojemos los primeros dias de la anyada mueva, i no los dias ultimos de la anyada pasada? Las personas tyenen una abitud de tomar muevas desizyones en entrando a una anyada mueva i kale desidar de kontinuar en esta atitud buena durante el anyo entero. Por egzempyo; para resolver todo en un punto, se prefera de empesar kon pasos chikos.

Kale ser realistos. Puedemos tomar una desizyon por egzempyo; de azer mas munchos egzersizyos, para pueder aflakar i konservar la sanedad. Para koryer un kilometro u kaminar kada demanyana ke es difisil en invyerno kon las luvyas; kale azer en kaza vente puntos de movimyentos, o demanyana o la noche.

No por sedaka, no vos arrepintesh!...  

Este anyo pensaremos i mos kreeremos veramente de aryento muestros korasones; ke va ver pas en el mundo, ke la umanidad no va pensar mas a lo negro; i va penar para ke el mundo se aga mas ermozo de dia en dia.

Para empesar, bushkaremos imediatamente un amigo ke pensa ke mos olvidimos de el.

Purifikaremos muestros meoyos, de las intisyones negras i del selo.

Estaremos mas delikados kon muestro entorno i mas finos.

Azeremos komplimentos a las personas para ke seygan orozos. Mos olvidaremos las indjustisyas ke mos izyeron.

Sintiremos mas muncho i estaremos atantivos.

Kuando estamos indjustos, no mos absteneremos de ekskuzarmos.

Daremos importansa a las ideas diferentes ke no son las muestras.

Kuando mos atristamos o mos inyervamos mos demandaremos: Este problema va ser tan importante despues de dos semanas?

Kuando tenemos menester de koraje, mos sugjeraremos de si para si.

No mos olvidaremos de sonreir mas muncho. Tendremos mas muncha tolerensya.

No es fasil de azer esto todo; ma kale empesar kon kreensya. I lo ke es provechoso de lo ke akomplimos este anyo, formara una eskalera para el anyo venidero. No kale arrepentir de las desizyones ke tomimos.

Una anyada mueva, es un avenir muevo. I la vida va pasar ansi, kon muevos dezeos, illusyones, emosyones i ideas...

Agora ke ya estamos en la semana de Rosh-Ashana ke es una de las fyestas  las mas importantes i el dia de arrogar al Dyo, en sintyendo el Shofar para orasyonar por el anyo muevo, por la sanedad, la felisita i por la pas i amor en el mundo entero…

Los djudyos toman muevas desizyones, se eforsan a purifikarsen de sus manyas; i tyenen la kreensya ke van a estar perdonados de sus pekados de la parte del Todo Poderozo.

Todos los aravyados kale ke se agan pas, ke se rekonsilyen antes de Rosh-Ashana para entrar sin pekados al anyo muevo.

Todas las promesas son ovligadas de realizarsen para ser una persona mas umilde i para ser mas fruktuozos a la umanidad.

Estaremos todos eskritos en los livros santos... Eskritas buenas i el Dyo ke mos guadre de las kozas ke no mos puedemos guadrar...

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın

İLGİLİ HABERLER

İLGİNİZİ ÇEKEBİLİR