Antes dos semanas tuve la okazyon de viyajar kon “BIZ BIZE TUR” ke es formado de dos haveres :
“Mordo Hazak” i “Cako Uyar” a Andalusia una rejyon ke se puede ver solamente en los esfuenyos.
El shef del grupo fue esta ves “Cako Uyar” kon su mujer
“Nora”, una persona ke no se topa, tanto atantivo kon las personas del grupo…
Un giador mansevo, sempatiko i muy savido.
Un joven, el patron de la ajensya, un pasha por ijo…
Un grupo de 22 personas ande todos no se konosiyan ma una kayentor entre mozotros ke no se puede topar.
Enfin el primer dia mos fuimos a “Granada”.
“Granada” es una sivdad chika de 250.000 personas. En la rejyon de Andalusia, Granada es la tyerra d’alkavo ke los Musulmanos peryeron despues de 8 siglos de las dinastias arabas.
Despues de los arabos los jitanos (zinganos), los katolikos i los djudyos bivyeron aki.
Empesando de la “Plasa de Isabel” la katolika, en el sentro de Granada mos dirijimos a pye asta “Albaicin” enkantados de la ermozura de la sivdad kon su istorya.
“Albaicin” fue el lugar ke moraron las primeras sivilizasyones ke vinyeron a Espanya: gregos, romanos, vizigotos i arabos moraron aki asta ke los kristyanos vinyeron. Las kalejas, las fuentes i los monumentos tan istorikos i magnifikos ke la “UNESCO” lo deklaro el
“Patrimonyo de la Umanidad”, en 1984 en mizmo tyempo ke el “Palasyo de l’Alhambra”.
“Albaicin” es el lugar ke estan morando los djudyos. Aki es entornado de kazikas blankas en las plazas chikas.
El palasyo de l’Alhambra es la perla, es un monumento muy emportante ke se deve de ver en Granada. No es solamente de Granada ma es el ojo preto de toda la Andalusia, un kompleks ke es formado de torres, palasyo i guertas ke estan manyetizando a las personas. En las paredes ay tejas koroladas, en el techo tejas koroladas i es por esto el nombre es ”Elhamra” ke kere dizir “korolado”.
Este palasyo se konstruizo en un monte ke esta vyendo la vista panoramika de la sivdad.
Un egzempyo maraviyozo del tyempo de la Ronesans de la Espanya es la “Katedral de Granada” ke se topa en el sentro de la sivdad. Esta katedral majestuosa ke se konstruizo en el anyo 1523, se dediko a la reyna Isabella i al rey Ferdinand.
Una arkitektura maraviyoza, unas broderias muy finas estan ornando la katedral.
Despues del komer de la noche en el otel, mos fuimos a “Sacramonte”, lugar konosido por el mundo entero por sus kavernas ke es la baza de la vida de los zinganos. Ay munchos bares ande kada noche ay un espektakulo de flamenko karakteristiko de esta sivdad.
A kontinuar
