La Tresera Estasyon En Andalusıa: Sevilla

Şeli GAON Judeo-Espanyol
18 Aralık 2019 Çarşamba

“Sevilla” es la sivdad la mas popular de “Andalusia” en Espanya. Kon su arkitektura rika i su akumulasyon kultural es una sivdad indispensable en Andalusia. Tyene una atmosfera egzotika. “Sevilla” es la mas grande sivdad i en mizmo tyempo la kapitala de esta rejyon kon 1.800.000 habitantes. El korason de Andalusia, “Sevilla” es la korona de la kavesa kon su entretenimyento, kon su visualidad i kon su kuzina.

La primera vijita en “Sevilla” fue a la katedral majestuosa ke empeso a fraguarse en 1402 i se termino en el anyo 1528. Despues de “Vatikan” en Roma, i la eglisya “Saint Paul” en Londres, es la tresera mas grande katedral ke egziste en el mundo. Las dekorasyones ke ay aryento i la splandor de la arkitektura gotika esta azyendo dizir ke una persona no puede azer esta maraviya.

La katedral la mas grande gotika i katolika del mundo es nomada: “La Katedral de Santa Maria”. La struktura muy empresyonante, refleta la prosperita de “Sevilla” ke posedava una perioda larga.

Despues de la katedral vijitimos el palasyo “Alcazar” ke es el simbolo de “Sevilla”, un lugar ke vijitan todos los turistos, una ovra maestra de arkitektura. Oy en dia el reynado de Espanya esta usando este palasyo, por esta kavza se esta aplikando una politika de segurita muy fuerte. Este palasyo es protejado por el “Patrimonyo Nasyonal”, es una parte de la lista del “Patrimonyo Mondial”.

Es una struktura ande puedemos ver las arkitekturas arabas, gotikas i de la Renaissance (renasimiento) i las kulturas muzulmanas i kristyanas.

Es una ovra majestuosa en forma de una “Luna Kresyente”. Delantre pasa un kanal de 500 metros i enriva del kanal ay kuatro pontes. Estos pontes reprezantan la monarkia de Espanya, (Kastilya, Aragon, Navarro, Leon).  Kuando estash mirando de enriva de estos pontes mos esta paresyendo ke estamos en Venezia.

“Plaza de Espanya” es la “Venezia de Sevilla”. El anyo pasado 70 milyones de turistos vijitaron la Espanya i Andalusia.

En “Sevilla” aviya 33 sinagogas porke la mas grande partida de los djudyos biviyan en Sevilla. Los djudyos aziyan komerso. Aviya en esta sivdad munchos siyantifikos djudyos, doktores i avokatos. “Barrio Santa Cruz” era la maalle de los djudyos. Es una rejyon ande los arvoles de portokales asombran las plazas, kayes estrechas kon pyedras, las kazas boyadeadas, los palasyos i las eglisyas istorikas i la vista de la katedral una vista fasinante...

Despues de los djudyos vinyeron aki los kristyanos. “Arkbishop Martinez”, izo derrokar 12 de las sinagogas en Sevilla. Despues achakes de la enkizisyon unos kuantos djudyos trokaron sus relijyones, unos se fuyeron de Sevilla. Oy “Beit Rambam” es la rejyon ande biven 160 djudyos.

Kon la avyertura del sentro djudyo en “Santa Cruz”, se selebran evenementos kulturales i selebrasyones en este sentro.

A la noche assistimos a una demonstrasyon de “Flamenko” maraviyoza, mujeres kon ombres muy reushido.     

Yo penso ke, “Andalusia” es una rejyon fasinante ke todos los djudyos deven de vijitar…

a kontinuar...

 

 

 

Siz de yorumunuzu yapın

Tüm Yorumları Görün