Unos kuantos anyos antes, entre dos sedutas le demandaron a la djuzgadora de la Korte Suprema de los Estados Unidos, Elena Kagan, ande estuvo el Noel pasado. Kon una sonriza, la Sinyora Kagan respondyo: “Komo todos los djudios, probablamente estava en un restorante chinezo”. El senator Charles Schumer, un senator djudio de Nueva York, ekspliko a sus kolegos ke los unikos restorantes avyertos en Noel son los restorantes chinezos i la mayoría de los otros establesimyentos de komida etnikos estan serrados achakez de la selebrasyon i sus vakansas kristiyanas.
El entereso de los djudios por las komidas chinezas se arrima a faktores otros ke de bushkar un lugar para komer en un dia partikular del anyo. Miraremos kualos son estas motivasyones.
Las komunidades djudia i chineza en los Estados Unidos son de dos las mas grandes minoridades no kristianas, i esto, desde el prensipyo del siglo XX. En 1910, aviya kaji 1,000,000 de djudios bivyendo en la sivdad de Nueva York, lo ke era el 25% de la povlasyon total de esta sivdad, i en el mismo tyempo, los amerikanos de orijin chinezo se mudaron de Kalifornia a basho Manhattan, bivyendo al lado de la povlasyon djudia immigrantes, i munchos de eyos entraron al negosyo de restorantes. La relasyon, poede ser un faktor de una jeografiya partajada.
Otros ven la gastronomiya chineza komo kulturalamente serkana a la komida kasher. En el empesijo del siglo XX, la fidelidad a las leyes tradisyonales de kashrut era muy diferente aryento de la povlasyon de imigrantes djudios. De una parte munchos konservaron las leyes dietetikas striktamente en akordo a la halaha, otros aplikaron a las vezes la kashrut i otros abandonaron kompletamente el kashrut. Si bien ay algunos restorantes chinezos kompletamente kasher (prinsipalmente en lugares kon grandes povlasyones djudias), la mayoría de los restorantes chinezos no se konforman a las leyes dietetikas djudias. Una diferensiya entre el mupak chinezo i las dietas italyana i meksikana es ke el mupak chinezo jeneralmente evita el uzo de produktos de leche. Para los djudios ke bushkan de alesharsen de las leyes dieteikas tradisyonales, ma sin alesharsen muncho, syertos argumentan ke la komida chineza es un tipo de kompromiso para evitar mesklar la leche i la karne. Ma, otros, komo el eskrivano de “Los djudios de Nueva York i la komida chineza: la konstruksyon sosyal de un model etniko” afirman ke adoptar el menu chinezo fue un akto de desobediensya a las striktas reglas de kasherut, porke el menu chinezo prezenta kozas de komer ke son muy etranjero al paladar kasher, komo produktos de puerko, langustas, karides i otras krustases de mar defendidos.
Otra propozisyon en este sujeto afirma ke se save ke el mupak chinezo se adapta a los paizes adoptados i podria ser ke los klientes uzados a la komida djudia se syenten buenos. La Sinyora Jennifer Lee, eskrivana de “The Search for General Tso”, argumenta ke “la komida chineza es el mupak etniko de los djudios amerikanos. De fakto, se identifikan kon eya mas ke kon el piskado gefilte fish, kon el karniyarik o kon todo tipo de komidas de la Evropa del Este”.
Josh Ozersky, eskrivano de alimentos, pensa ke a los djudios les plaze la komida chineza porke es muy fasil para “take away”, para yevar a kaza en paketo. Kulturalmente, eskrive el, a los djudios les plaze komer en kaza, i la komida djudia tradisyonal toma muncho tyempo para aparejar. La komida chineza se puede yevar a kaza mas kolay i jeneralamente es mas fasil para aparejar.
Transladado i adaptado libremente del Jewish Treats.
