Shabbat la noche me fui kon los amigos al teatro de Göztepe en la eskola djudiya. El teatro era la kontinuasyon de lo ke izyeron el anyo pasado “Keres Kazarte Kon Mi” la sigunda partida: “Ande Aviyamos Kedado?”
Un teatro kompozado de tres jenerasyones, chikos, mansevos i grandes kon una armoniya, una ekipa kaji de 40-50 personas todos muy reushidos en sus rolos sin olvidarsen ni una palavra.
Una pyesa, seya kon el kontenido, seya kon los mesajes ke dyo, enteresante i komika. Un esforso muy grande del mas chiko al mas grande, un lavoro muy difisil de pueder arekojer tantas personas para las provas. Felisitasyones de aryento mi korason…
Göztepe es una asosyasyon ke arrekoje a los mansevos djudyos, i aze ovras i aktividades kulturales komo teatros, paseos, partis para adjuntar los djovenes en entegrandolos a estas aktivitades.
El sujeto era: Un mansevo de İzmir kon una manseva de Estambol se aviyan kazado el anyo pasado. Dos famiyas muy diferentes. Los de Estambol modernos, rikos ke no tyenen dinguna idea sovre las tradisyones djudiyas. La famiya del novyo una famiya djudiya ke aze todo modo de tradisyones, fyestas todo komo kale.
Los mansevos arekojyeron sus famiyas para dizirles ke se van a divorsar, ke se van a espartir. Un shok muy grande para las dos partes. La kavza de kitarsen no inche ni un kueshko de igo. Vaziyumbres i patranyas… Komo los mansevos de oy… Las famiyas estan bushkando una koza para ke no se esparten i estan topando ke sin la “Ketuba” no se pueden kitar.
La novya i el novyo estan bushkando en sus famiyas esta ketuba en demandando a sus madres, padres, granmamas, granpapas, tiyas, tiyos… En bushkando, los evenementos ke estan pasando muy enteresantes. A la fin se estan ambezando ke la ketuba esta en Israel ande una paryentes. La novya i el novyo se estan indo a la tyerra santa sin saver ke sus paryentes los estan sigiendo para ke no puedan topar esta ketuba.
Entremyentes, la novya se esta rankontrando kon su amigo de chikes i se esta indo kon el a kaminar, i el novyo esta rankontrando su amiga de manseves i se esta indo kon eya a bever en un bar i a baylar. Esto es un djugo ke prepararon las famiyas. Ma los mansevos se estan enselando el uno del otro i se estan aserkandosen.
A la fin los dos padres abasharon de la shena i entre los spektatores le rogaron al Presidente de la Komunita: “İshak İbrahimzadeh kon su mujer Tuna İbrahimzadeh” a vinir a la shena para ke avlen kon los mansevos i ke los agan esvachear de este divorso. Las kestyones i la avla de los dos fue muy reushido i se arrepintyeron de divorsar. Fin oroza…
Todas las kantikas muy sentimantales; kon las bozes maraviyozas, la fuersa del djugo, la dominasyon de la shena, el dirijir esta pyesa, la orkestra, el dekor i los kostumes, las luzes, el makyaj...
Veramente, yo penso, ke esto es un lavoro de lokos. Arekojer a tantas personas; mujeres, ombres, mansevos, mansevas, kriyaturas, ayudantes, ambezarles a kantar, avlar, djugar, azer provas, en dias i oras diferentes; porke todos estan lavorando u estudyando.
Syempre de mijor a mijor.
Felisitasyones; a todos los dirijentes del Göztepe Kültür Derneği de tener la veluntad de krear estos projektos; para pueder detener la manseves djudiya entre eyos i para evitar la asimilasyon!
La amistad ke tenesh entre vozotros, ke puje de dia en dia para motivar i adelantar vuestra organizasyon kon munchas reushidades!
