En 1964, Kirk Douglas aviya vijitado la Eskola Amerikana de Estanbol komo el ‘Representante de Pas’

Dora NİYEGO Judeo-Espanyol
12 Şubat 2020 Çarşamba

El famozo artisto de Hollywood Kırk Douglas, ke aviya ganado grande fama en el mundo entero kon el filmo Spartacus, el filmo ke fue konsiderado komo uno de los filmos los mas emportantes del siglo XX, vijito Estanbol kon su mujer Anne, en el anyo 1964. El kupl se kedaron en Estambol durante tres diyas. El aktor, ke se kedo en el Otel Hilton, en la konferensya de prensa en el otel, disho ke el Prezidente Kennedy le aviya demandado de azer este vyiaje komo “reprezantante de pas”. Douglas disho ke famozos artistos de los Estados Unidos fueron embiyados a todos los payizes del mundo para aplikar este programa de “buena voluntad” yamado “People to People”, i  ke esta idea era de Kennedy. El objektivo prinsipal de este programa era ke “las personas pueden konosersen mijor i pueden bivir en pas en  deskuvriyendo los lados buenos i negros de kada payis”.

En la sala de reunyon del Kolej Amerikano de las Ijas, Douglas saludo los elevos en dizyendoles: “Merhaba! Nasılsınız?”. Las ijas del Kolej Amerikano no kijeron desharlo al aktor, i ekspresaron sus admirasyon kon biervos komo “Ke ombre maraviyozo!”, “El ombre de mis eshuenyos!”, i a la fin del deskorso, kompitieron para obtener una firma de el. “Todas estash muy ermozas, i elegantes. Me esto sintyendo komo si ke vine de los Estados Unidos para estar entre ijas tan ermozas. Yo siempre dishe ke las mujeres son mas entelijentes de los ombres” disho Douglas. Una de las elevas de este periodo, eskrivyo en sus rekuerdos estos biervos: “Kaje todos los profesores de muestra eskola eran pro-Kennedy, i mozotros kompartiyamos sus alegriyas i sus tristezas. Mozotros, las elevas, no estavamos muy kuryozas de kualo Kırk Douglas iva avlar, lo ke keriyamos ver era solo el foyo enriva de su barva”.

En su deskorso, Douglas, en referando al lugar de los artistos en la sosyedad, disho ke “la lingua del arte es universal. Por modo de esto, el arte puede progresar el entendimiento enternasyonal de una manera mas fasil.  Kuando las relasyones entre los Estados Unidos i Rusia eran negras, los artistos amerikanos i rusos vijitavan los payizes del uno al otro, i eran resividos kon grande karinyo”. Avlando kon los elevos de la eskola mas tarde el mezmo diya, el aktor disho ke el esta dando grande emportansa al rolo ke los elevos pueden djugar para mijorar el entendimyento entre las personas. ‘’Los mansevos son kuryozos, entuziastos i agresivos. Los mansevos siempre deven mirar al futuro, i kestyonar todo para topar mijor respuestas a munchos de los problemas del mundo. La pas mondyal esta en las manos de los mansevos”.

Siz de yorumunuzu yapın

Tüm Yorumları Görün