3 Temmuz 2020 Cuma 01:08

La famiya Royal Ingleza i los djudios

Metin DELEVİ Judeo-Espanyol 2473 görüntüleme
12 Şubat 2020 Çarşamba

El 6 de febrero de 1952, la reyna Elizabeth II paso al trono de “el Reyno Unido i sus otros reynos i territorios” despues de la muerte de su padre, el rey George VI. La Reyna es muy kerida por todos sus sujetos. Ma kije darvos unos kuantos detalyos sovre la relasyon entre la monarshiya ingleza i los djudios i el estado djudio.

En un artikolo, Anshel Pfeffer, se refera al eskritor Simon Sebag Montefiore, desendente de Sir Moses Montefiore, afirmando ke “istorikamente la famiya royal britanika teniya una relasyon muy amistoza kon la komunidad djudia. Esta tradisyon kontinua desde el siglo XIX asta oy. Los miembros de la famiya royal asisten abitualmente a munchos eventos djudios i apoyan ovras i organizasyones djudias. İ esto se konsidera un akto totalmente normal en la Ingleterra”. Afilu el Prens Charles tyene su propya kippa de velur blu kon la amblema royal de plata, ke lo mete  kuando asiste a eventos rituales djudios.

En el 60en aniversaryo de la liberasyon de Auschwitz, la Reyna Elizabeth se reunyo kon los sovrebivyentes del Olokosto en el Palasyo de St. James en Londra. Malgrado ke la Reyna Elizabeth II es muy punktual i es muy raro ke alarge su oraryo determinado, Lord Rabbi Jonathan Sacks, el Gran Rabino de la Ingleterra, disho ke la reyna se kedo kon kada sovrebivyente “asta ke eskaparon de kontar sus istoryas personales. Fue un akto de amabilidad ke kaji me izo yorar”. Un sovrebivyente ajuto: “No saviya si yo iva bivir otrun diya, i agora esto avlando kon la reyna, una koza de no kreyer.”.

El Prens Charles, el ijo grande de la Reyna Elizabeth i eredador al trono, malgrado el fakto de no ser djudio, fue sirkonzidado por el rabino Dr. Jacob Snowman, el mohel prensipal de Londra. Los ijos nasidos en la Kaza de Windsor, fueron sirkonzidados por un mohel deste el tiempo de George I (1660-1727). El fue el ke trusho esta tradisyon de su pais natal Hannover, Alemanya.

La reyna tyene una istorya pro-djudia ke vyene de su famiya en lakel se puede bazar. Se save ke la Reyna Victoria (1819-1901) era parsyal kon munchos djudios i ke el ijo de Victoria, Edward VII (1841-1910), tambyen teniya una relasyon muy entim i kayente kon los djudios. La esfuegra de la Reyna Elizabeth, la Prensesa Alicia de Battenberg, esta enterrada en la Montanya de los Olivos, en Yerushalayim, i abrigo munchos judios en su kaza en Gresya durante el Olokosto. Fue rekonosida  por Yad Vashem komo una “Justa entre las Nasyones”.

Malgrado ke la Reyna Elizabeth II nunka realizo una vijita ofisyal a Israel (desde la fin del mandato britaniko de Palestina), el Prens William realizo una vijita ofisyal en Junyo de 2018, i el Prens Charles, asistyo, en tal ke reprezentante ofisyal de su pais, al Kongreso Mondial del Olokosto en Yerushalayim antes 2 semanas. El Prens Charles asistyo a los funerayes de Yitzchak Rabin i Shimon Peres komo vijitas privadas.

Enfin no mos olvidaremos ke los djudios fueron arondjados de la Ingleterra por el Rey Edward I en 1290 i envitados de muevo solo 350 anyos despues.

 

 

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın

İLGİLİ HABERLER

İLGİNİZİ ÇEKEBİLİR

HUKAT i BALAK

Mozotros Ailesi-İrvin MANDEL

Mozotros Ailesi-İrvin MANDEL

Tünelin Ucu-İzel ROZENTAL

Tünelin Ucu-İzel ROZENTAL