7 Temmuz 2020 Salı 01:46

El dia de las mujeres

Şeli GAON Judeo-Espanyol 3966 görüntüleme
18 Mart 2020 Çarşamba

Mizmo ke ya paso una semana, kije partajar mis sintimyentos sovre la “MUJER”, keridos lektores. El 8 de marso es el Dia Internasyonal de las Mujeres, es el rekuerdo del dia espesyal de la ganansya de los derechos de la mujer.

En el anyo 1860, las lavorantes de tekstil en New York kijyeron una vida komo benadam i lucharon por una vida kon igualdad, sin apartamyento i tenyendo todo modo de derechos komo los ombres.

Las Nasyones Unidas, el O.N.U., en 16.12.1977 desidio de fyestar este dia kada anyo el 8 de marso.

Las mujeres son muy aktivas seya en sus kazas, seya en sus karyeras; saven lo ke keren i arivan a sus butos. Kon sus kalmo i entelijensya, reushen en sus profesyones solas u kon sus ekipas. Influensan kon sus avlas dulses, i konvensen al d’enfrente.

Eyas son madres de sus ijos, mujeres de sus maridos; tyenen munchas ovligasyones i responsabilitas en sus nidos i reushen en munchos espasyos importantes.

Eyas korren a todo modo de kozas, abastesen, krean un montante de echos ke es difisil de pensar mizmo.

Oy, munchas mujeres estan en un nivel igual ke los ombres en la politika, ekonomika, komersyal i volontaryos. Unos echos ke son imposivles de realizar, se pueden solvar kon la intelijensya pratika de las mujeres.

Por egzempyo en la Amerika aviya unos kuantos anyos ke una mujer muy reushida estava represantando el ministeryo del eksteryor. En esto kero komemorar una de las mas grandes mujeres del mundo ke desho una trasa inolvidavle en la istoria kon su kapachita, su semplisita i su kerensya. En este dia espesyal kero nombrar a esta maraviyoza mujer ke admiri syempre: GOLDA MEIR.

Golda Meir dirijo un pais muy emportante del mundo. Rezolvo munchos problemes kon su intelijensya, su dinamizmo i su intuisyon i fue reushida. Me  akodri de una konseja en este sujeto.

Ben Gurion en 1947  para fondar el pais de Israel establesio un partido kon su ekipa. Los myembros de este partido eran todos ombres i solamente Golda Meir, la mujer unika. Kuando los inglezes se apersivyeron, serraron el partido, i echaron en prezo a todos los ombres. Komo Golda Meir era mujer la desharon libera. Uno de los myembros disho al amigo: “A mozotros mos aprezaron, ma eyos no saven ke la mas valutosa, la mas kapache de entre mozotros esta afuera”.

Esto mos amostra ke munchas mujeres komo Golda Meir estan adelantre de los ombres en los echos importantes de los governos. Eya fue una de las fondadoras del pais.

A las mujeres les plaze ke sus keridos esten a sus doredor; ke se akodren de sus dias espesyales komo dia de nasimyento, dia de kazamyento (avizo a los ombres!) i esto amostra ke son muy sentimentales.

El ombre i la mujer son “dos puerpos i una alma”; son iguales.

Las mujeres toman munchas responsabilitas debasho de sus alas kerensyozas.

Eyas son las kolonas emportantes de sus famiyas, i nunka ke no se derroken.

Entonses kero felisitar todas las mujeres del mundo entero por sus kerensyas, sus intelijensyas, sus kapachitades por amenajar sus famiyas i el dorredor de sus echos profesyonales. Ke nunka no manken porke eyas son el ekilibro del mundo.

 

 

 

 

 

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın

İLGİLİ HABERLER

İLGİNİZİ ÇEKEBİLİR

HUKAT i BALAK

Mozotros Ailesi-İrvin MANDEL

Mozotros Ailesi-İrvin MANDEL

Tünelin Ucu-İzel ROZENTAL

Tünelin Ucu-İzel ROZENTAL