En el otonyo del anyo 1943, kuando miles de judyos en la Italia okupada por los nazis fueron embiyados a los kampos de konsantrasyon, un grupo de doktores deskuvriyeron una manera de salvar duzenas de vidas: enventar una hazinura tan mortal ke los soldados nazis se ivan a fuyir de los hazinos.
Esta hazinura fue envantada el 16 de oktobre 1943 por unos kuantos doktores italyanos antifashistos, kuando los nazis atakaron un geto judyo serka del riyo Tíber de Roma, i empesaron a embiyar a los judyos a los kampos. Syertos judyos se eskondyeron detras las paredes del Ospital Fatebenefratelli. Los doktores del ospital izyeron un plano para salvar estos judyos fujitivos. Enventaron una hazinura i le metyeron el nombre Sendrome K. Dingunos no supyeron ke era una hazinura falsa. Sesenta anyos despues, estos doktores konfesaron esta mintira.
Les disheron a los nazis ke los hazinos pueden enfektar los ke estan en kontakto kon eyos. Los nazis se aripintyeron de meter estos hazinos a los trenes de deportasyon.
Dr. Adriano Ossicini, un doktor antifashisto ke estava lavorando en el Ospital Fatebenefratelli, desidio de meter el nombre Sendrom K a esta hazinura falsa. Kuando un doktor trayiya un hazino del Sendrom K, el ekipo medikal del ospital ya saviyan ke pasos deviyan de tomar. "Todos ya se aviyan ambezado ke el hazino no era hazino, ma ke era judyo", disho Dr. Adriano Ossicini al periodiko italiano ‘La Stampa’ en el anyo 2016. "Tambien se eskrivyo el nombre de esta hazinura en los dokumentos de los hazinos porke los nazis keriyan saver de kualas hazinuras estavan sufriyendo los hazinos. La sinyifikasyon del Sendrom K, era Kessling o Kappler. Kessling por Albert Kessling, el komandante nazi ke estava dirijando la okupasyon italyana de Hitler, i Kappler por Herbert Kappler ke era el shef de los SS responsavles de un asasinato de munchos judyos. Dar el nombre de estos vilanos a esta hazinura mortal mos vino muy apropriado", estuvo kontando Dr. Adriano Ossicini a los jurnalistos.
Los nazis, espantozos de apegarsen a esta hazinura kontajyoza, no se estavan mezmo aserkando de las salas ande estavan estos hazinos. Tambien aviya kreaturas entre estos fujitivos. Los doktores les ambezaron de toser kuando un soldado kuryozo se estava aserkando.
"Los nazis pensaron ke es una hazinura komo tuberkulosis, i se estavan fuyendo komo perros de kasa" disho el Dr. Ossicini.
Kuando, mas de medyo siglo despues, salyo en medyo ke estos doktores enventaron una hazinura para salvar duzenas de judyos, estos doktores fueron rekonosidos komo "Justo entre las Nasyones" por Yad Vashem, un Sentro Mundial para el Rekuerdo del Olokosto. Tambien estos doktores estuvyeron lavorando en una organizasyon ke transferava munchos hazinos judyos de los getos al Ospital Fatebenefratelli para ke fueran kurados mijor.
El Ospital Fatebenefratelli fue tambien rekonosido komo una "Kaza de la Vida" por la Fondasyon Enternasyonal Raoul Wallenberg, ke onora los salvadores del Olokosto.
El Ospital Fatebenefratelli fue tambien konosido komo un refujyo para los judyos persegidos. La administrasyon del ospital aviya permetido de dar dokumentos falsos a los doktores judyos ke no eran permetidos de lavorar komo doktores.
Personas salvadas por los doktores en el Ospital Fatebenefratelli fue probablemente alrededor de unas kuantas duzenas. Kuantos judyos fueron salvados no es muy emportante: lo emportante es el pensamyento, la kapasidad i la buena volundad de los doktores Sacerdoti, Borromeo i Ossicini ke fueron una grande esperanza en un momento kuando finales feliz eran muy pokos.
