En mi chikes moravamos en Galata, komo todas mis amigas de eskola. Mi mama entro a esta kaza kuando teniya 8 anyos. Despues ke se kazo kontinuo a morar aya, por kesu mama se aviya murido muy manseva i mi mama teniya kudyo de su padre i ermanika ke era 10 anyos mas chika de eya.
Kaje en todas las kazas de Galata, las tualetes eran muy chikas.
En las tualetes se topava la tualet, un lavabo, una kurna i una dush. Apenas ke mos puediyamos meneyar. De sorte ke la makina de lavar no kaviya aya. Las makinas de akel tiempo eran muy grandes. La muestra se topava en la kuzina. Me akodro ke teniya i un tapon brodado ensima.
El diya del lavado era un diya de salir lokos para mozotros. Viniyamos de la eskola i entravamos a una kaza ke todo se meneyo de su lugar. Vos kontare.
De la noche se ampasava a rayar shavones. No aviya deterjanes akel tiempo. Al diya la makina de lavar la kitavan de la kuzina, la trayiyan al hol ke teniyamos djusto en medyo la kaza i a la entrada de la puerta de la kaye. Se kitavan los kuvos, legenes, paylas, sestos, todos en medyo. Eramos 6 personas en kaza, i komo dizen, konta kavesas, mete bonetos, asigun la djente eran los lavados. Se apartavan los lavados, las savanas i los kavesales, las tovajas, las kozas blankas i las de kolor i mas…
Se inchiya la makina kon kuvos ke inchiyamos del banyo. I se ampesava a lavar. Estos lavados no se lavavan todos enjuntos siguro, kon sira. 15 puntos una partida, se esprimiya, se kitava, se metiya la sigunda partida ets. Despues kaliya vazyar las primeras aguas. Las makinas de akel tiempo no teniyan hortumes, teniyan abasho una fuente ke metiyamos los kuvos debasho. Kuando se inchiyan, las yevavamos a la tualet i las vazyavamos. Ayde demuevo inchir la makina kon aguas kayentes, meter la sigunda partida i ansina kontinuava este lavado asta ke la tresera agua se aziya sin shavon.
El hol entero se inchiya de paylas i kuvos, en unos aviya el lavado de la primera agua, en unos aviya de la sigunda. No kaliya mesklar la sira. Ya eskapo el lavado bendicho el Dio. Ya era sira de enkolgarlos. Se desparesiyan los kuvos i las paylas a unas a unas. Se alimpyava la makina, se tapava kon su tapon i se metiya a su lugar.
Asta akel punto no puediyamos konsentrarmos a azer leson. De una parte lavado, de otra parte gizar i komer. Un telash ke ni ke me kero akodrar. Ah ke ermozo esta agora, piza al boton kita el lavado ya esta kaje seko. Mas no ay “DIYA DE LAVADO”.
Kuando me kazi yo, dainda no aviya estas makinas otomatikas, aviya unas makinas semejantes. Ma al menos aviya hortumes para inchir i vazyar las makinas. Aviya lugar en las tualetes i fuentes spesyales.
Keridos amigos, solo de pensar komo me deranjava estos diyas de lavados, despues ke ampesaron mis ijikas a la eskola siempre ize atansyon a eskapar el lavado antes ke tornen eyas, para ke veyan todo espajado.
