Leyla Navaro

Şeli GAON Judeo-Espanyol
20 Mayıs 2020 Çarşamba

 

Antes unos kuantos dias tuve el plazer de sintir  “Leyla Navaro” ke mos dyo munchos detalyos enteresantes sovre la Corona. Tomi munchas notas i le tomi la permisyon de eskrivir las enformasyones valutozas ke mos dyo en djudeo-espanyol para profitar de su saverisyo.

 “Leyla Navaro” es una psikologa i eskrivana de la psikolojiya, muy konosida. Lavoro sovre el desvelopamyento personal i tyene livros sovre este sujeto. 

Su avla es empresyonante i dulse.  Empeso su avla en dizyendo ke para mantener sano el sistem nervioso kale:

-      Komer sano, no komer pezgado.

-      Enfuerteser la immunita.

-      Estar leshos de fumar i de bever alkol.

-      Azer egzersizes en kaza, movimyentos ke es emportante.

-      Bever los chayes de herbas, el chay vedre.

-      Tomar sol i el vitamin D ke es muy emportante para la salud.

-      Arefreskar muestro meoyo kon los evenementos kulturales i artistikos.

La Kriza de Corona es Kompozada de 7 Partes:

1-    La situasyon de shok.

2-    No akseptar.

3-    Tomar kolora.

4-    Depresyon.

5-    El aprovar.

6-    La perioda de desizyon.

7-    Inkluzyon.

La sinyifikasyon de esta perioda: En kitando lesones kale prosperar.

-      Los Sentimyentos: Tener espanto es el mas grande sentimyento. Entregarse al espanto es difisil i danyozo. De una parte el espanto proteja la persona de azer lokuras.

-      Anksyeta: Es un sentimyento ke mos okupa komo el espanto. Mos toma komo esklavo i mos desrepoza. Kale ke dominemos muestros sentimyentos. 

-      Estamos tomando kolora, estamos bivyendo una frustrasyon porke estamos detenidos. No estamos azyendo lo ke keremos, komo salir a la kaye, ver los ijos, avlar kon una amiga…

-      El sentimyento de la insertitud mos esta aprovando. Kualo va ser despues de un mez? El repozo mos se esta fuyendo. Esto se esta transformando en una kolora, en una ravya. El sentimyento del enfasyo mos esta aprovando tambyen. Estamos dezesperados en pensando ke puede ser la Corona va empesar de muevo. La esperansa mantyene la persona biva.

-      La tristeza: La preokupasyon del avenir, el espanto de la situasyon finansyera. La pedrita i el dolyo son unos sentimyentos ke se biven muy duro, muy triste… Todo esto es una “TRAVMA”. Estamos bivyendo la insertitud ke es muy normal, porke la situasyon esta anormal.

-      La kapachitad de salir abash kon la “TRAVMA” :

-      La kreensya es mas ke emportante. El poder de la spiritualidad es emportante i devemos de mantenerla fuertamente.  Azemos orasyones i mos kreyemos a mozotros mizmo. La kreensya es una metod de afrontamyento.

-      Ekspresar las emosyones relaksa el puerpo. Por esta razon, tratamos de nombrar los sentimyentos de los ke tyenen la travma.

-      La nesesita de la sosyalizasyon i apartenensya. Tenemos menester de la kayentor del otro.

-      La imajinasyon es emportante. Azer pintura, eskrivir kualker koza, gizar u partajar los semineres mos aze santralizar la imajinasyon.

-      Aktivitades mentales… Estar enformados de todo, tener el esprito okupado para pueder salir abash kon el espanto del evenemento. 

-      Azer spor, aktivitades fizikos porke, la aktivitad mos ayuda a la disparisyon de la enerjiya negativa. Kale ke estemos syempre en movimyento. Gizar, eskrivir mos ayuda a trankilizarmos para pueder mantener la salud mental.

-      Para pueder protejar la salud mental, “Leyla Navaro” mos sugjero 10 propozisyones.

1-    Mantener la rutina de kada dia. Esto mos da una grande konfiensya.

2-    Dar responsabilidades a los myembros de la famiya.

3-    Dar una regula a muestra kaza ande estamos bivyendo.

4-    Ser enformados mos da el sentimyento de kontrolar todo.

5-    Ser muy aktivos sosyalmente i ser responsavles es emportante. Mos aze sintir fuertes i mos enkoraja. Kooperar i solidarizar.

6-    Mantener el kalmo purifika muestro esprito i mos mantyene bivos. No djuzgaremos al den frente.

7-    Usar el umor para detenermos bivos i aktivos.

8-    Somos aktores i no viktimas. Las viktimas son pasivas. Los aktores son aktivos.

9-    No pedreremos muestra esperansa. La esperanza es la kuedra ke mos mantyene en la vida.

         10- El sintimyento de agradasimyento es refreskante. Da una saturasyon. Kale dar loores al Dyo, a la Natura i a la Vida.

Este virus es una oportunita u es un perikolo?

Mos esta ambezando a bivir dia por dia. Una oportunita para amejorarmos. Asigun las istatistikas realizadas:

En la India la kontaminasyon del aver se diminuo de 60%.

La natura se esta renovalando i arribivyendo.

Esto mos esta dando la oportunita de pensar i ambezar. No veremos este virus komo una punisyon. Tomaremos esta pandemia komo una okazyon para la umanita.

Despues de esta tempesta, no vamos a ser las mizmas personas.

Kale ver el pozitivo al lado del negativo. Mos renovaremos. Todos estamos pasando por un test de rezistensya.

Kale ke mos ambezemos a salir abash, a tener pasensya.

No savemos nada sovre el avenir.

Estamos muy liberos i mos estamos konfrontando kon mozotros mizmo.

Estamos azyendo kozas sin depender de dingunos.

Estamos Fuertes Todos Endjuntos…

 

 

                                

                     

                 

 

Siz de yorumunuzu yapın

Tüm Yorumları Görün