Dizde ke muryo Miryam, se enkuvryo el pozo de agua ke iva kaminando kon el puevlo. Topandosen a ora el puevlo mankos de agua se rekojeron todos sovre Moshe, porke los kito del Ejipto i los yevo a este dizyerto ke no ay nada de bueno ni mizmo agua para bever. Moshe i Aaron ke ya se avian dezuzado de estas litigas, se deskorajaron muncho de esta mueva pelea, komo ke se fuyeron del puevlo i se entraron a el Mishkan.
En el Mishkan, se les aparesyo la onra del Todo Poderozo, i disho el Kriyador a Moshe ke rekojgan todo el puevlo i ke digan a la penya ke les amostra ai ke kitara agua, i ke bevan todo el puevlo, eyos i sus bestyas. Moshe tomo la vara sigun la enkomendo el Kriyador i rekojendo a todo el puevlo delantre la penya les disho Moshe kon ravya: Sintid, reveyadores, keresh ke de esta penya vos kitemos agua? Moshe harvo dos vezes kon su vara a la penya, i salyo agua, agua en abondansa i bevyeron todo el puevlo i sus bestyas.
El Kriyador ke ya savemos ke apunta kon los Buenos asta el ultimo grado, ma no topo djusto este konporto de Moshe i Aaron. Sovre esto les dize a Moshe i a Aaron Akoen por este pekado ke kometyeron no van a ser meresyentes de traer a los djudyos a la tyerra prometida, i ke deven murir en este dizyerto.
El puevlo arivo a una sivdad nombrada Or. En este lugar les disho el Kriyador a Moshe i a Aaron syendo ke Aaron no va entrar a la tyerra prometida, kon esto ke se apronte para murir i espartirse de este mundo. Le dize a Moshe Rabenu ke tome a Aaron i a Elazar su ijo, i ke los suva a la montanya Or, i ayi ke aga deznudar a Aaron Akoen de sus vistidos de Koen Gadol, i ke se los aga vistir a Elazar su ijo, i Aaron ke se rekojga i se muera ayi. Moshe Rabenu izo el komando del Kriyador. Los djudyos lo yoraron a Aaron i lo endecharon 30 dias. Aaron teniya 123 anyos kuando muryo.
El rey de Moav, Balak, kon el puevlo de Midyan, desidaron entre eyos de mandar a yamar a Bilam el echizero ke morava en Peor para ke maldiga a los ijos de Israel. Mandaron unos grandes personajes de la sivdad de Moav i de la sivdad de Midyan i vyenen onde Bilam, i le rogan al nombre del rey de Moav, Balak, de vinir kon eyos a la tyerra de Moav i maldizir a los djudyos. Las personas ke mando Balak le dizen a Bilam, nuestro rey Balak esta muy siguro ke a ken maldizes es maldicho i a ken bendizes es bendicho.
Bilam les dize ke el no es un echizero sino ke es un profeta ke esta debasho de el orden del Dyo santo, ke esperen una noche i el les respondera.
El Dyo aparese su vizyon a Bilam i le demanda ken son estas personas ke vinyeron onde ti? Bilam le responde ke son mandados del rey de Moav por ke vaya ayi i maldiga a Israel. El Dyo le defende de ir a maldizir a los djudyos syendo el puevlo djuyo es un puevlo bendicho.
Bilam no reusho a maldizir a el puevlo djudyo, sino ke los bendisho a el puevlo kon estos biervos: O, puevlo santo de Yaakov, kuantas ermozas i buenas i onestas son tus tyendas, i tus moradas.
