Syempre Tener Las Manos Limpyas

Metin DELEVİ Judeo-Espanyol
8 Temmuz 2020 Çarşamba

Lavar las manos es aktualmente un tema kayente achakes del virus COVID-19. Desde el 11 de Marso, kada diya i diya, ventikuatro oras sovre ventikuatro estamos oyendo esta lektura:

Para protejarvos del virus COVID-19:

a. Salyendo a la kaye o estando en un lugar ande ay djentorya devesh de meter una maska (afilu si no puedesh tomar suluk!!!),

b. Devesh de alesharvos a lo menos dos metros de la djente,

c. I lo mas importante, devesh de lavar o dezenfektar las manos en la kaye o en kaza de manera ke esten syempre limpyas (ya miri, entre los ke metyeron esta ley no aviya  fabrikatores de shavon o dezenfektan!!!).

Savyendo ke la ley djudia da muncha importansa a la limpyeza i sostyene la proteksyon de la salud, el djudaismo syempre fue en la vanguardia en el respekto de los sujetos de ijyena.

Devemos sinyalar ke las kostumbres djudias de lavarse las manos en kada nada i el alto valor ke se da a la limpyeza personal pueden aver tenido un impakto en la istorya mondial. En el tyempo de la Edad Medya, kuando puevlos enteros fueron desimados, kuanto por la pesta negra o kuanto por otras pandemiyas, los djudios teniyan una proporsyon sinyifikativamente mas poka de enfeksyon. Malorozamente, munchos kazalinos kreyeron o los izyeron kreyer ke estas hazinuras akontesyeron porke los djudios estavan propajando la hazinura o entosegando los pozos, i malorozamente, komo rezultado se peryo munchas vidas djudias.

Si estos kazalinos inyorentes saviyan ke la pesta se propajava por las pulgas i por los ratones, i ke la povlasyon djudia era mas poko afektado devido a la ijyena natural inkorporada en la observansya djudia, podiyan tener mijor posibilidades de bivir.

Ma, ay otras razones relijyozas. 

La ley judía rekomenda lavarse las manos despues de uzar la privada i antes de komer (spesyalamente antes de komer pan). Ijyeniko? Siguramente. Ma, en este kavzo, la agua se uza para eliminar las "impurezas spirituales" ke se mesklan a las manos en tokando syertas partes del puerpo o achakes de un kontakto jeneral kon un mundo fiziko no tan limpio (es una idea orijinado de la Kabala).

En kada anyo, en Pesah, antes de empesar a meldar la Agada, kualo dizimos?

Urhatz: SE LAVARAN LAS MANOS i non diran beraha, por ke non van a komer ayinda matsa. 

I djusto antes de komer la matsa. 

Rohtsa: SE LAVARAN LAS MANOS, i diran beraha por ke van a komer matsa.

I los mas importantes, esta agua no se desha en el legen i se deve de vazyar a la pila porke despues de lavarse las manos la agua se ensuzyo. Otro sinyo de ijyena! 

La Tora ordena a los djudios ke se esfuersen por suvir a un nivel de santidad (Vayikra 19: 2), ke se puede despues de preparativos i partisipasyon en aktividades relijyozas santas. Lavarse las manos antes de komer troka el komer en un akto sakro (“komemos para bivir!" – Mishley Shlomo/Proverbios 13:25). Lavarse las manos despues de salir de la privada permite a uno a partisipar konveniblamente en un akto sakro. Munchas personas tambyen se lavan las manos antes de la orasyon. Ya se entyende la razon.

En los primeros dos egzempyos ke vimos, el lavar de manos es segido imediatamente por una beraha. Lavar las manos i despues meldar la beraha mos ayudan a rekonoser ke la komida es un regalo del Dio i mos permite a rekonoser ke es una nesesidad para ke muestros puerpos fonskyonen korektamente. 

Aki vimos unos dos egzempyos, ma en la Tora, el Talmud i otros livros relijyozos puedemos topar otros egzempyos sovre la nesesidad de lavar las manos.

Siz de yorumunuzu yapın

Tüm Yorumları Görün