Oy, solo mil i kinyentos judios kedaron en la komunidad judia de İzmir, ke tiene una rika erensia, i ke un tiempo, teniya trenta i kuatro Sinagogas, famozos savios, i rikos komersantes.
Kompozada prensipalamente de los refujiados de la ekspulsion espanyola de 1492, la komunidad judia de İzmir se aminguo duspues de las emigrasiones a İsrael i a Estanbol.
Oy, solo tredje Sinagogas egzisten en la sivdad. La mitad de estas Sinagogas estan en ruinas, kon tejados rotos, i objektos relijiozos pedridos.
Kon la kooporasion del governo turko, el munisipal de İzmir, i la komunidad judia, un grupo de donatores i akademikos de İsrael, empesaron a lavorar para restorar las Sinagogas, i establisir un komplekso ke se va transformar en ‘un muzeo de la vida judia’.
El Proyekto İzmir, ke empeso en el anyo 2002, esta dirijado por la Fondasion Mordehai Kiryati en Tel Aviv, ke es una fondasion por proyektos edukativos.
Las tredje Sinagogas ke kedaron, estan situadas en la Juderia, ke es la seksion vieja judia de İzmir. Estas Sinagogas konstruidas kon la architektura espanyola del Siglo de Oro, son ‘’el testimonio de una rikeza judia’’ ke egzistiya en İzmir.
Una koleksion de manuskriptos, i de teksos halahaik, vistidos de los tabuhim, i otros objektos santos ke fueron salvados por la komunidad, estan guadrados en una kamareta chika del ospital judio de la sivdad. El ospital fue donado a la munisipalidad porke la komunidad no puido mantenerlo.
UNESCO deklaro los sitios judios de İzmir komo ‘’un sitio enternasional de kultura i de arkeolojika’’.
El Proyekto İzmir se va formar enriva de un grupo de sinko Sinagogas. Este komplekso se va transformar en un muzeo grande, i un sentro kultural kon enstutisiones akademikas.
‘’Un sentro de edukasion judia sovre Ladino, i sovre los judios sefaradis de İzmir, va preparar aktividades i programes, i va avrir klasas i kursos para estudiantes de istoria ke vana vinir del etranjero, i para akademikos ke estan investigando las komunidades judias i sus erensiyas’’ esta dizyendo Ziderman Chanan, el direktor de este proyekto enternasional. ‘’El nombre de este proyekto va ser ‘’El Proyekto de İzmir: Un Viaje i un Dialogo entre Kulturas’’.
La komunidad de İzmir arekojo 50.000 dolares por los gastes de restorasion, ma el komplekso i el muzeo va kostar milyones de dolares. Las preparasyones vana ser kompletadas fin el medio del anyo 2010. Paras por este komplekso estan vinyendo de los fondos en la Union Evropeana, ke son apartadas por la prezervasion de erensias. Los donatores rikos judios, i las fondasiones judias estan tambien partisipando en los gastes de este proyekto.
Los grupos judios tienen la esperansa de konvertir este sitio en un objektivo para el turizmo edukativo İsraeliano. Los turkos tambien estan esperando ke este proyekto se va konvertir en un sitio turistiko. ‘’Este sitio va ser un sentro para el dialogo interkultural’’ esta dizyendo Ziderman. ‘’La majorita Musulmana de İzmir ke no konosen Sinagogas, vana utilizar este sentro para ambezarsen komo los judios de İzmir bivyeron entre eyos en los anyos pasados’’.
El video aparejado por este proyekto esta amostrando komo la komunidad judia de İzmir de mas de kuatrosientos anyos, puido kedar en pies mezmo ke vieron tantas gerras, un raj (deprem), i un trokamiento politiko.
Si los akademikos i los filantropistos detras de este proyekto vana reushir a eskaparlo, la erensia de los judios de İzmir, ke es una chika parte de la istoria judia, no va ser pedrida.
