Un filmo de Radu Mihaleanu LE CONCERT

Dora NİYEGO Judeo-Espanyol
29 Eylül 2010 Çarşamba

En el empesijo del filmo, estomos konosiendo Andrei Simonivich Filipov, el viejo direktor de la orkestra de Bolshoy, ke fue degradado a konsierje por modo ke aviya ayudado los muzisienes judios de la orkestra.

Andrei Filipov, en alimpyando la kaza de un personaje emportante, topa una envitasion adresada a la orkestra de Bolshoy, para ke den un konser en el Teatro de Chalet en Paris, duspues dos semanas. Andrei pensa ke esto es una oportunidad para eskapar el konser ke fue enterompido por los otoridados komunistos del pais, trenta anyos antes.. Andrei se desida de topar los viejos muzisienes de Bolshoy.

Mas duspues mos estomos ambezando ke, trenta anyos antes, una noche, en medio de un konser, Brejnev entro al teatro para ekspulzar los miembros judios de la orkestra de Boshoy. Andrei tambien fue ekspulzado porke el aviya tomado judio muzisienes a la orkestra..

Estomos viendo el antisemitizmo ofisial, el predjuzmo tradisyonal kontra los judios enkurajado por los dirijentes del governo. Oy mezmo, la mizma koza no esta afitando en siertos paizes?

Radu Mihaileanu, el direktor de este filmo, es el ijo de un komunisto romano ke fuyo de los kampos de eksterminasion de los Nazis. Mihaileanu simpre eskojo temas judias en sus filmos.

Radu bazo este filmo en en el antisemitizmo, i en los evenemientos historikos del tiempo de Brejnev. La istoria de este filmo es bazada en un evenemiento reel. Su filmo ‘Va, vis et deviens’, ke gano un premio en el anyo 2005, es sovre la entegrasion difisil de los judios de Etopia, los Falashes, en la sosiedad de İsrael.

Andrei empesa a bushkar los viejos muzisienes judios de Bolshoy kon su amigo Sacha Grassman, el violonisto de la vieja orkestra, ke agora esta lavorando komo el konduktor de las ambulansas.

Andrei kere ke la orkestra djuge Tchaikovsky, i ensiste ke la famoza kantadora Anne-Marie Jacques seyga la solista de la orkestra en el konser de akeya noche.

Duspues ke Andrei i Sacha Grossman reushen a arekojer los viejos muzisyenes kon mil difikultades, el diya del konser ariva.

El konser fue la parte la mas ermoza del filmo. Los espektatores del konser en el filmo, i tambien los espektatores del filmo suivaron el konser kon grande plazer. La muzika de Tchaikovsky i la emosion de los muzisienes de salir a la sena duspues de tantos anyos, fue un show muy empresionante por los suivantes.

‘Le Concert’, siendo un filmo traji-komik, en vezes esta aziendo riyir, i en vezes yorar. La amor por paras de los judios (vendiendo todo modo de kozas en Paris para pueder ganar dos groshes i kedando tadre al konser por modo de esto), los personajes aziendo todo modo de trukes s para realizar sus esuenyos, situayenes rusos aparejando pasaportos falsos a los zinganos en el airoporto para ke puedan entrar a Paris, son unos kuantos egzamplos de la komedi.

Los lordes de la Mafia, los viejos komunistos eskarinyandosen del komunizmo de un tiempo, i aziendo todo lo posivle para pueder trayer atras el komunizmo en el pais, el eforso de los lavorantes para pueder ganar unos kuantos rubles, la ermoza violonista bushkando sus avuelos, son unas kuantas de las otras chikas temas del filmo.

El personaje prensipal del filmo fue muy reushido en komunikando el stres i el lirizmo de un maestro. Andrei, komo lo aviya pensado, el konser de akeya noche en Paris, lo ayudo a azer pas kon su pasado.