La Moda Dekontraktada Feminina
Para tener el look de la sezon, los modistos adaptaron la elegansa maskulina.
Segir la moda, en dando el fokus al konfor.
El kostum redingot, el jile, el papiyon, la kravata i, sovre todo, el chapeyo de fotr, akompanyado de kalsados kon koch alto, la paleta de kolores korajozas, va azer bivir el gusto, LA SILUETA feminina.
“Nunka salir de kaza sin chapeyos!” konsejaron los modistos.
Las vestimientas de kolores frapantes dominando el enverano, van a deshar lugar a los tonos “tierra de Sienna”, okre amariyo, maron, bordo i siguro el preto, en el otomno ke se aserka.
Inspirado de las ovras abstraktas del pintor holandezo Piet Mondrian, el trend troka kon el ensemble de diferentes ropas ke se adjuntan, se kombinan, para trayer una dimension diferente.
Los kreatores, modistos, los unos se inspiran del Renaissance, el klasiko, por sus koleksiones i otros se eforsan para ser eksepsional, ekstravagantes o frivolos...
Las linyas simples de las formas jeometrikas i kubikas, orizontal, vertikal, o triangular, mos anunsian una sezon komfortable.
La presensia de la tekstura del kuero i la interpretasion new-life parese dominar el otomno/invierno 2014.
Las fustas romantikas, kloshes o fronsadas, ke markaron los anyos 1940, kon Rita Hayworth, Lauren Bacall, Ingrid Bergman i Katherine Hepburn, las akrisas simboles de elegansa feminina, estan inspirando el 21 siglo.
Las sinturas retro refletan el aspekto “lady” kon las formas klasikas de pioniero Christian Dior, Chanel, Oscar de la Renta, ets.
Espero i sueto, por la mujer, de resplander kon el briyo ke va enkantar muestros padres, maridos, ermanos, ijos, sin olvidar el proverbo:
LES JEUNES POUR PLAİRE ET LES VİEUX POUR NE PAS DEPLAİRE.
