Relasyones entre las tres jenerasyones

Coya DELEVİ Judeo-Espanyol
23 Temmuz 2014 Çarşamba

Despues de aver echo el teksto sovre las relasyones entre los paryentes i los ijos, pensi ke puedemos avlar un poko sovre las tres jenerasyones tambien. Yo, asta antes unos kuantos anyos no saviya ke se fyesta i el Diya de los Avuelos. No konosko todos los dtalyos, ma ya se ke se selebra en Septembre (o kaji). Muncha djente konsideran estos diyas espesyal komo un preteksto a la lokura de gastar i los kritikan. Este sujeto lo desharemos para el  Otomno.

Kualo puede ser el ayudo, la fonksyon de los grande-paryentes, de las gran-mama’s i gran-papa’s en la edukasyon, en el engrandesimiento de los inyetos? En ke grado los paryentes del chiko konsideran este ayudo komo pozitivo o nesesaryo.?.. O, es ke lo estan achetando por no romper el korason de los “nonos” i lo estan tolerando? Muy probavle ay diversas repuestas a mis kestyones. Porke en kada famiya las kondisyones son diferentes.

Aki, kero avrir una paranteza i apuntar una konsepsyon ke a mi grande regreto, egziste oy en diya en syertas famiyas. Es la diferensya (imajinarya, non fondada) entre ser avuelos paternal o maternal. İ, otomatikamente esto aze pensar a los raportos entre esfuegra i ermuera malorozamente. En realidad no kero atrazarme sovre este sujeto ke me desplaze i no do aprobasyon absolutamente.

Yo esto sigura ke el ayudo de una avuela (oy son muy mansevas !!) deve ser el bienvenido. En realidad, lo ke deranja los paryentes de los chikos es la “muncha kara” (gatarlos) ke dan los “nonos i nonas” a los inyetos. Ya es verdad ke en vezes es egzajerada i bastante en kontradiksyon kon el modo de edukasyon ke toman los ninyos de sus djenitores.

Seya para mi i mi marido, seya para los chikos, puedo dizir ke era un grande plazer kuando mis inyetos veniyan a kedarsen a mi kaza.Personalmente, de dinguna manera no tuve dinguna diskusyon ni kon mi ermuera, ni kon mi ijo. Porke, syempre ke los teniya al lado de mi a los inyetos, me akodrava de akeyos anyos leshanos, kuando teniyamos chikas diskusyones kon mis paryentes achakes ke le davan muncha kara a mi ijo, sus primer inyeto.

Agora, veremos un poko del punto de vista de los inyetos. Ke pensan de los grande paryentes? Asigun los chikos komo son eyos? Los avuelos son los grandes amigos de los inyetos, son sus sekretores. Ay en vezes chikos, inosentes sekretos ke no tienen ozadiya de dizir al papa o a la mama, ma ke los nonos i nonas konosen! Los avuelos tienen pasensya sin limita. Syempre tienen muncho tyempo i fuersa!... para djugar kon eyos, para kontarles konsejas al koste mizmo de olvidar la komida en el orno!..

Kuando los inyetos vienen a pransar ande los nonos, estan siguros ke van a topar los platos ke les plaze. İ ke alegriya de ver los chikos komer kon gana, ke felisidad…Tambien, los inyetos ya saven ke syempre los avuelos tienen una sorpreza para azerles plazer. 

Son amigos maraviyozos ke reushen esto todo porke tienen mas muncho tyempo i pasensya ke los paryentes. Esto no es mi idea, keridos lektores. Es en jeneral, los inyetos ke pensan ansi. Para mi, es un fenomeno, una koza maraviyoza este buen akordo entre dos jenerasyones separadas kon decenas de anyos, kon mas de medyo siglo.

Es difisil de eksprimir en byervos el sentimiento maraviyozo de ser avuelos. Es komo tornar a los anyos ke engrandesimos  muestras kriaturas. Agora, ver los inyetos bolando kon sus propias alas, lavorar en la karyera ke eskojyeron mos esta dando una grande satisfaksyon i orgolyo tambien.

Por terminar la konsejika de dos nonas: “Dos granmamas se fueron kon sus inyetizikos al bodre de mar, en una playa. Las nonikas entraron en un ondo moabet myentres ke los dos chikitikos djugavan kon kuvos, paletas i arenas. En supeto una ola imensa vino i se la yevo a la  una kriatura.

“La nona ampeso a gritar, a yorar i  pelarse los kaveyos. En esto, komo la primera, vino una fuerte ola, esta vez traendo la kriatura sana i rezya. La nona, de la alegriya, no savyendo ke azer, koryo al bodre de mar, avyendo las manos al sielo en rengrasyamiento, todo en dizyendo: Mİ İNYETO TENİYA UN CHAPEO, VESTİYA UN CHAPEYİKO, KE SE İZO??!!”.

Kedad en buena ora keridos amigos.