Una mueva trega de 24 oras entre İsrael i el Hamas

Klara PERAHYA Judeo-Espanyol
20 Ağustos 2014 Çarşamba

Lunes la noche el 18-19/8/2014,  inmedyatamente despues las oras 24,  ‘una mueva trega de otras 24 oras entre İsrael i el Hamas’ fue anunsyada.

La Biblia mos dize: Meti delantre de tu puerta  el byen i el mal, eskoje el byen.

Oy, parafrazando estas mizmas palavras, D.yo puedra dezir a Israel komo al Hamas, “Meti delantre vuestras puertas la Paz i la gerra…eskoje la Paz”.

En ke kampo  ke sea, en el kampo del vensido o byen en el del vensedor, la gerra es (komo ya fue dicho la semana pasada) una desfecha para los dos. La paz, eya, es paridera de vida, jeneradora de komprensyon i mizmo, a una data serkana o leshana, de posibilidad de amistad .

 Myerkoles la noche de la semana pasada, 45 minutos antes la fin del segundo ‘sesar el fuego de 3 dias’ promulgado konjuntamente  por la armada Israelyana i las fuersas del Hamas,  el medyador ejipsyano ansi ke los delegados palestinyanos i İsraelyanos deklararon ke la trega fue alargada de 5 otros dias  afin de pueder ayegar a una konkluzyon akseptavle de parte de los dos adversaryos.

Fueron ‘sinko dias’  syempre de anksyedad, es veredad, ma de una anksyedad mesklada de  esperansa i de un esforso puede ser ezitante  ke demando por seguro muncha madures de pensamyento.

Es syempre ansi, no se puede nada  obtener sin nada dar, ni nada ganar sin renunsyar a previlejyos  manko importantes.

Dos elementos de baza dirijen la Humanidad…La vida i la muerte…La vida kon sus inmensas posibilidades, la vida ke mos preskrive de respektar ‘el otro’ i de akseptar el fakto ke ‘este otro tambyen es una kriansa humana kon sus aspirasyones i su ideal’….La muerte, eya, es komo un espasyo vazio sin limite ni objetivo.

Desgrasyadamente, el 21em siglo no es solo (tal ke lo avia dicho André Malraux) el siglo de la relijyon. El es tambyen i mizmo prinsipalmente ‘el siglo del fanatizmo’.

No se puede nyegar ke en todo modo de argumento o de opinyon ay una parte de verdad komo tambyen de simple  supozisyon i komo todos ya lo savemos byen, en kada relijyon monotheista o pagana ay un kodigo imperativo de ethika i ekidad. Ma oy en dia no es esto ke la aktualidad mos propoza, al kontraryo en varyos kavzos, la relijyon mos pusha simplemente en direksyon de una afirmasyon eksesiva de muestra supremasia sovre el otro. İ ansi  munchas vezes se desvelopa  en el esprito del vensedor una voluntad de dominasyon ke lo puede dirijir  a una derrota futura,

Segun lo ke meldi en el teksto de una intervensyon de Alain Finkielkraut durante un kolokyo  del kual el tema prinsipal era ‘la idea de humanidad’:  “Nietche persivia el puevlo djudyo komo un puevlo ke reusho a dominar el resentimyento i la rankor i a dezir ‘Sİ’ a la Vida.”