ESTAMBOL... (Sivdad de Mil Fachas) -3

Coya DELEVİ Judeo-Espanyol
10 Eylül 2014 Çarşamba

En mi teksto presedente dishe ke no pretendo konoser perfektamente todos los distriktos de muestra sivdad. Egzakto… Ma, ay un Sentro en  Estambol ke vijiti munchas vezes: Sultanahmet…Profitando ke estamos en el distrikto nombrado, “La Peninsula İstorika (Tarihi Yarımada), ampesaramos a muestro torno tambien istoriko…Agora es mas fasil de vinir aki. En desparte de los Pontes del Bosfor, tenemos i el Metro “Marmaray” ke ata debasho la mar,la Kosta Asiatika a la Peninsula İstorika.

Dar un torno en Sultanahmet es komo azer un viyaje a traverso 3 mil anyos, 3 Imperios. Es el punto de enkontro de las sivilizasyones Grek, Romana, Bizantina, Otomana i Turka. En diferentes partes se ven sus trasas.

 Kontinuando de la plasa de Sultanahmet verso Beyazıt, por las dos vandas de Chemberlitash... Manaderos afirman ke aki se topava el “Forum Constantinus”, uno de los mas importantes de la epoka. Komo prevas de las instalasyones Bizantinas en estos lugares, mensyonan las “Sisternas Binbirdirek” i “Maksima” del tyempo del Imperador Theodosius.

Sultanahmet reelmente es uniko kon su aspekto de “Muzeo plein air”. Eglisyas Bizantinas i Meshkitas, las Murayas de la vyeja sivdad, las sisternas i los Palasyos Otomanos son lado kon lado. Es komo la senteza de las sinko sivilizasyones. Es el sentro ke pudo konservar su importansa istorika desde la Epoka Bizantina. El “Hipodromo” del distrikto i su derredor troko de nombre kon la konkuista de Estambol por Fatih Sultan Mehmet en 1453. Se empeso a nombrar komo “At Meydanı” (plasa de kavayos).

Entre diversas ovras istorikas, aki se deve sitar el “Obelisko” (Dikilitaş) traido de Ejipto por Theodosius I, i famozo por sus “Hiyeroglifas”. Tambien, la “Fontana Alemana”(Alman Çeşmesi) arregalada en el 19.Siglo a Sultan Abdulhamit II, por Wilhelm II... Ken no tiene sintido la fama del “ Palasyo Topkapı”, de “Ayasofya”, de la “Meshkita Sultanahmet”?... A mi opinyon, este distrikto es el lugar egzakto para empesar a konoser Estambol, porke, komo disho un eskrivano estranyero: Durante siglos Sultanahmet fue el sentro ande bate el puso de la sivdad”.

La grande Meshkita Sultanahmet es konosida komo “Blue Mosque”. Tomo este nombre de la esplendor del lavoro sin igual de sus fayanses (chini) blu. Fue fraguada entre los anyos 1609-1616. Es un lugar ke dingun turisto puede neglijar de vijitar. En el distrikto, el “Muzeo de Mozaika”, mos da la posivilidad de admirar las famozas mozaikas del Palasyo Bizantino.

Klaro ke no es posivle de konoser i ver todo en unas kuantas oras. Se deve apartar, a lo menos, un diya espesyal para el Palasyo Topkapı, si se kere ver una por una todas sus dependyensas.

Antes de entrar por la puerta prinsipal, vemos la remarkavle “Fuente” “III Ahmet Çeşmesi” ke dyo su nombre al distrikto i  echa myentres el reynado de Sultan Ahmet III... En el korso de los anyos se estuvo adjustando muevos “pedasos” al Palasyo Topkapı, morada de la Dinastiya Otomana durante 400 anyos. Kon el trokamiento de rezidensa ordenada por el Sultan Abdulmedjit a Dolmabahche, el Palasyo Topkapı fue abandanodo a su suerte asta 1924, data de su transformasyon en muzeo. Se puede vijitar diversos espasyos enteresantes en el seno de este domeno.

Devemos rekonoser los lavoros de konservasyon.En este kuadro kero sitar la Eglisya “Aya Irini”, aktualmente famoza kon los konsiertos en este lugar mistik. Otrun lugar enteresante, la Sisterna, “Yerebatan Sarnıcı”,. konstruida por el Imperador Justinyen en el 6.Siglo, komo “Sisterna Bazilika”. Una erensya grandioza Bizantina.

Estamos delantre el importante edifisyo maestuozo, achetado universalmente komo una maraviya: “Ayasofya”.  “Hagia Sophia”, ovra “kolosal” sinyifika “Sensya Divina”. Despues de la konkuista de Estambol por los Otomanos, se troko en “Ayasofya”: edifisyo istoriko fraguado komo eglisya en la era Bizantina, transformado en meshkita a la segida de 1453 i aktualmente un muzeo famozo...

Fragua ampesada en 360 D.C, por Constantinus, kompletada por su ijo Constantinus II i destruida en un fuego. La fragua aktual en grande dimensiones, fue echa myentres el reynado del Imperador Justinyanus I  i terminada en 5 anyos, en 537. Justinyanus, enfrente la vizyon maestuoza, la komparo al “Beit Hamikdash” ke fue el Templo konsiderado komo el mas grande asta akel tyempo. Dizen ke el Imperador se esklamo: “Shelomo, Shelomo, ya te depasi a ti!!...”

(a kontinuar)