ESTAMBOL… (Sivdad de Mil Fachas) - 4

Coya DELEVİ Judeo-Espanyol
15 Ekim 2014 Çarşamba

En el teksto presedente, deshimos el İmperador Justinyanus enfrente la vizyon maestuoza de la “Hagia Sophia”. Komparandola al “Beit Hamikdash” i  eksklamando: “Shelomo, Shelomo, ya te depasi a ti!... Penso ke aki devemos avrir una paranteza antes de kontinuar kon “Ayasofya”.

Al pareser, syertos soverenos Bizantinos eran obsedados por la maestiya del “Templo de Yerushalayim”. Tengo meldado ke el İmperador Basileus ke reyno entre 867-886 i es supozado aver fondado la Dinastiya Masedoniana, teniya una obsesyon: la grandor, espesyalmente la valor del Beit Hamikdash i kompararlo kon la Hagia Sophia. Aviya dado orden a un savyo djudio de bushkar i topar la preva ke la Hagia aviya kostado mas muncho. A la fin de kuentos i heshbones interminavles, se arrivo a la konkluzyon ke el Templo de Yerushalayim aviya kostado mas demaziya en oro… Klaro ke el Sovereno Bizantino no kedo muy kontente de esta konkluzyon!...

El interyor de Ayasofya reflekta toda le esplendor del “ Arte Bizantino” kon las mozaikas, el marmol kolorido, las plakas de marfil (ivory) ets…Manaderos afirman ke grandes kantidades de oro i plata empleados en las dekorasyones, fueron sakeados (pillados) por los soldados kruzados en el empesijo del 13. Siglo i malorozamente no se pueden admirar oy.

Es muy evidente, en el Sentro ke estamos vijitando ay una dominasyon de trasas de los Imperyos Otomano i espesyalmente Bizantino. İze una chika bushkidad  sovre los djudios de la epoka Bizantina. Por empesar, kero transferar un pasaje del artikolo de la presyoza eskrivana Beki L. Bahar (de b.m), kon sus propios byervos:

“Poko savemos sovre los judyos del Imperyo Bizantino, ke los judyos del Imperyo akel tyempo lo nombravan UZ-BUZ. El solo Imperyo ke duro mas de dyez syeklos, mil anyos!.. Fue i kontinua a ser investigado, analizado i eskrito por istoryografos de diferentes nationalitas en diferentes tyempos. Tambyen kontado por munchos pasajeros, ma todos estos, apenas si pasa el byervo Judyo. Mizmo los judyos viajadores komo el famozo Benjamen de Tudela del dodjen syeklo o Rabi Petachia de Ratisbon solo anotaron lo ke vyeron o sintyeron. Malorozamente ni un istoryografo judyo no uvo entre eyos, ke los Rabanites los nombramos Romanyot, porke aviya en Bizans tambyen munchos aklarados judyos de valor del sekto Karay. El primer ke ampeso estudyos sovre los judyos de Bizans fue el Prof. Samuel Kraus de Budapest (1866-1948)”...

Asigun seryozos manaderos, el Rabino Binyamin mi Tudela es el primer viajador evropeo del 12. Siglo, ke reusho a aserkarse de las frontieras Oeste de la Kina (China). Viyajo durante 13 anyos kon el eskopo de ambezarse las kondisyones de vida  de los djudios evropeos i asiatikos. Partyendo de la Espanya, vijito el Sur de la Fransiya, Italya, Gresia, una partida del Medio Oriente i Persia arrivando asta la frontiera kineza. En su kamino de retorno estuvo en Ejipto, el Norte de la Afrika i Sisilia.

Myentres estos viajes,vijito i Constantinople, Kapitala Bizantina de la epoka. Binyamin de Tudela, en su lavoro “Masaot” (eskrito en ebreo) esta alavando las rikezas del Imperio Bizantino, las ovras i ermozuras arkitekturalas de Constantinople. Vinyendo a los djudios ke biviyan en esta sivdad no esta muy kontente. Mos konta sus vida kaji mizeravle, sus kondisyones de inferioridad, de arrebashamiento i maltratamiento de la parte de los bizantinos ets...

Es un fakto ke los sentros akademikos konsideran el “Sefer Masaot” komo un importante lavoro, bazado sovre sitasyones i nombres otantikos. Portanto, de otra parte ay un grupo de istoryanos ke se aserkan kon insertitud, kon un syerto dubyo a diversos relatos de Tudela. Afirman ke en “Masaot” el autor munchas vezes no esta “objektif” o ke probavlemente mensyona lugares ke no vido personalmente, lugares ke solamente sintyo sus nombres i sus egzistensyas...

Keridos lektores, yo no me konsidero en pozisyon de azer komentaryo sovre este sujeto. En desparte, me parese ke me aleshi un poko de muestro sujeto prinsipal. No eskapi de sitar aki todos los lugares istorikos o turistikos del distrikto. Esto deshando a los pasajeros i vijitadores, el plazer de azer sus propias deskuvyertas!!. Espero toparmos en serka para konoser mas sovre Estambol.

A kontinuar...