ESTAMBOL… (Sivdad de Mil Fachas)- 5

Coya DELEVİ Judeo-Espanyol
30 Ekim 2014 Perşembe

Oy, estamos kontinuando a konoser Estambol, esta vez de una perspektiva enteramente diferente. En esta seriya de tres tekstos, vamos azer la konosensya de unos kuantos egzempyos de los desenes, tablos panoramik i gravuras. Todos tienen un sujeto komun: Estambol, Kapitala del İmperio Ottomano. Egziste un grande shifro de ovras semejantes i kada una de eyas mos estan dando bastante indisyos i una idea sovre la vida de la epoka. Koza ke, sin duda, no se podriya reushir afilu kon un livro o livros de munchas pajinas…

Ay de esto unos, kuantos anyos, despues de ver la ekspozisyon de “Panoramas i Gravuras” amostrando en grande dimensyones el Estambol de una epoka, aviya pensado de azer un teksto semejante. La sovredicha ekspozisyon eran ovras de Antoine Ignace Melling i de Montagu B.Dunn, ofisyer de la Marina Ingleza ke vino a Estambol en medio de los anyos 1850…

No me akodro egzaktamente las dimensyones de las ovras artistikas  realizadas antes la deskuvyerta de la fotografiya. Ma, el nombre de Melling no era muy deskonosido para mi. Lo vamos enkontrar ansi ke i otros artistos, mas avansando en muestro chiko torno a traverso la “Atraksyon del Bosfor”...

El arte “Panorama” es un invento de la “Renaissance”. Tiene sin dubyo una valor artistika indiskutavle al lado de su partikolaridad de pueder “kaptivar” una ancha perspektiva. Konsiderandolo de otro angolo, tiene tambien una grande importansa istorika.

El “Arte” en su jeneralidad, seya pintura, muzika o seya literatura, me aze grande plazer, malgrado ke no puedo ni pintar, ni kompozar alguna muzika ets..Vinyendo a la sovredicha ekspozisyon, me aviya enteresado un poko al sujeto. En todo kavzo, komo lo dishe mas ariva, absolutamente no pretendo ser espesyalista o otoridad en la matiera. Simplemente, kije azer este teksto profitando del “materyal” arrekojido myentres mis bushkidades...

En la mayoriya de gravuras estamos vyendo ermozos egzempyos otantikos de la Arkitektura Otomana. En este sensyo, el pintor i arkitekto aleman Antoine İgnace Melling (1763-1831) izo fama kon sus desenes sovre el Bosfor i Estambol en jeneral, ande bivyo kaji 20 anyos. Su gravura panoramik amostrando el “Abad Kasrı” en el distrikto de Bebek, es konsiderado komo la mas reushida vizyon de su epoka. Kritikas de Arte kalifikan el lavoro de Melling komo teniendo un “otantik naturalizmo”…

Es komo travar  la fotografiya del momento i transferarla a su pintura o gravura. El prefero azer anchas panoramas, kuando suvyendo a la Torre de Galata, a las kolinas de Üsküdar o las terasas de las kancheleriyas estranyeras de Pera (Beyoğlu). Portanto, un fakto es inkontestavle: el Bosfor syempre atiro los eskrivanos i pintores dezeozos de fiksar Estambol en sus pajinas o en sus pinturas o gravuras.

Melling entervalo, estuvo tambien tomando notisyas importantes sovre la manera de vida Otomana. Munchos eskrivanos se aprovecharon de las gravuras i notisyas de Melling en sus ovras, espesyalmente del livro “Voyage Pittoresque de Constantinople et de rives du Bosphore”. Si no me yerro, en las arshivas del Sr. Ara Güler se puede ver syertas de estas ovras.

A kontinuar...