El muevo Governo İsraelyano fue validado de parte de la Knesset

Klara PERAHYA Judeo-Espanyol
20 Mayıs 2015 Çarşamba

Djuevez de la semana pasada el 14 del mez de Mayo 2015, el Parlamento Israelyano valido el muevo Governo establesido debasho la prezidensya de Benyamin Netanyahu i kompuesto del Likud i de dos otros partidos, el uno ultra nasyonalisto, el otro formado de 4 grupos relijyozos entre los kualos se topan haredim literalmente fideles a los tekstos i preskripsyones de la Antiguidad.

Es lo ke es, el Dyo Baruhu ke bendiga İsrael i pushe los pasos de esta mueva koalisyon en direksyon de la “Paz” i de la “kompresyon del Otro”, lo ke solo puedra asegurar la perenidad del Payis.

 Puevlo sin tyerra propya durante un muy largo tyempo, dispersado en diferentes partes del mundo durante 2000 anyos, puevlo kompuesto de eternales migrantes venidos de varyas esferas terrestras, el Puevlo Djudyo es ansi en mizmo tyempo : una entidad “muy homojena” en sus aspirasyones imperyozas de progreso i de dinyidad, i tambyen “heterojena” vlsto los diferentes orijenes de los individuos ke la kompozan, edukados en esferas diferentes, los unos profundamente oksidentales, los otros orientales, kada uno kon sus uzos i kostumbres (herensya de vyejos avuelos), su razonamyento personal i su propya vizyon de lo ke devra ser el futuro de Israel.

Komo syempre, munchos komentadores dyeron en la prensa sus opinyon personal a este sujeto i ansi varyas kestyones vyenen al tino de kualkyer persona, laskualas vos kero komunikar sin ninguna pretensyon:

”En las sirkunstansyas aktuales, ke puedra ser el poder de aksyon del Muevo Governo kon una mayoria de solo 61 myembros en el Parlamento, kuando en su totalidad la grande İnstitusyon es kompuesta de 120 deputados?

Ke sera sus relasyones politikas kon varyos grandes payizes oksidentales los kualos kaji syempre sostenyeron lo mas posivle los intereses djudyos i ke oy son partizanos de una paz rezya i djusta ansi ke de la kreasyon de un Estado Palestinyano lado kon lado kon el Estado İsraelyano, en kondisyones absolutas de seguridad mutual, i ansi absolutamente refraktaryos a un “Grande Israel demokratiko” kompuesto al empesijo de ‘una mayoria de djudyos’ mesklada a una ‘minoridad de muzulmanos’, kada kompozante kon su propyo ritmo de prokreasyon, faktor ke es muy importante i ke puedra krear en el futuro el enorme inkonvenyente para la populasyon djudia de toparse, un dia, delantre proporsyones absolutamente inversas, argumento ke (vos akodrarash) avia sido el thema prinsipal de la kampanya elektoral de Tsipi Livni a la okazyon de una presedente eleksyon?

İ por revenir a la situasyon prezente, ke seran las desizyones futuras de Benet  ke a la mas chika okazyon se apresura de azer fraguar muevas kolonias sovre tyerras palestinyanas, pretekstando ke en la antiguidad eyas apartenian al puevlo hebreo?

Ke sera sovre todo la situasyon de un İsrael entornado de payizes vizinos, por la mas parte enemigos, entre los kualos algunos nyegan su egzistensya i mizmo dezean su eradikasyon total?

Enfin, ke sera la situasyon ekonomika de los israelyanos djudyos komo tambyen de los ke praktikan una otra Fey, ke son de mas a mas nombrozos a toparsen en un estado de grande mizerya, entre los kualos “los Beduinos nomades” ke biven en Israel i los “Beta-Israel” atados a la Biblia i no al Talmud, personas de orijen etiopyana i de kuero muy bruno, de las kualas la djudaidad fue rekonosida de parte de grandes relijyozos de muestro puevlo?