Divorsar es la fin del mundo?

Şeli GAON Judeo-Espanyol
24 Haziran 2015 Çarşamba

Alhad despues de midi estuve kon unas amigas ke no mos frekuentamos muncho; ma kuando mos vemos kontinuamos komo ermanas de ande kedimos fina oy…

La kerensya ke tenemos entre mozotros es inkreivle.

De esto puedemeos kitar una leson ke; estar leshos u verse (görüşmek) 5-6 vezes en el anyo no es problem.

La kerensya es un sentimyento ke vyene de aryento del korason. Estar endjuntos, discutir es agradavle (zevkli).

Ma sintir divorsos de los ijos u ijas ke konosemos de chikes, los paryentes, las famiyas krea una tristeza.

Alhad fue lo mizmo para mi. Las amigas kontando; la ija de esta, divorso kon dos kriyos despues de 15 anyos, el ijo de la fulanika divorso kon tres chikos despues de 20 anyos etsetera…

Muestra Komunitad ande se esta iyindo?

Penso ke; kon esta vida kanseryoza, i kon la fason del lavoro de los mansevos, malorosamente peryimos mas o menos todas las valores (değerler) familyales.

Mozotros madres u padres, ya mos olvidimos de avlar kon los ijos. Mos estamos asentando a la meza, todos en la mano kon un telefon mallogrado, no ay ni mirar a las karas, no kedo ni una ekspresyon (ifade). Todo mekanik, todo teknolojik.

La unyon, el kazamyento se esta terminando en un punto.

Diferentes razones ke no se estan puedyendo resolvar entre dos personas, se estan refletando (yansıyor) a los chikos.

Personas ke estan endjuntos anyos i panyos, tyenen un komporto kon enemistad (düşmanca).

Pekado de los chikos ke no tyenen dinguna kulpa, solo de vinir al mundo.

Las madres u los padres estan utilizandolos komo armas (silah) para menazar (tehdit etmek) el den frente.

El espanto de kedar solo, la insekuritad ekonomika, la presyon del entorno son problemes negativos.

Derrokar un kazamyento, seyga de la parte del ombre, seyga de la mujer es un evenemento muy difisil i influensa a los chikos psikolojikamente. Esta epoka difisil es triste i kanseryoza para las dos partes.

Ay una regla de oro para no estruirse (yıpranmamak).

• No kale partajar kon otros todo lo ke se pasa,

• No avlar i diskutirse allado de los ijos,

• No kedar en la influensa de los paryentes i amigos,

• No egzajerar los evenementos es muy emportante.

Kuando se partaja; los puntos negativos pujan, i los puntos pozitivos se aminguan.

De kuando ampeso a lavorar las mujeres; no kedo la tolerensya, el komporto de navegar (idare etmek) el den frente, lo mas emportante, no kedo la kondukta (davranış) de muestro tyempo. Ke kale azer idare al marido!...

Las mujeres; kuando el echo del marido no esta muy bueno, difikultades ekonomikas estan ampesando, no estan puedyendo suportar i Adiyo, Kedavos en la buena ora… No ay pensar al avenir.

Komo se van a engrandeser los chikos; los problemes de la vida, estar solas, no esta empidyendo del todo.

Los paryentes kale ke protesten (itiraz) esta situasyon.

Fondar una famiya no es fasil, ma derrokarla es en un punto.

Kale pensar profondamente i avertir (uyarmak) los mansevos antes de bivir esta katastrofa ke esta enfluensando a la famiya entera i al entorno.