Dos regretavles kavzos en dos de los payizes los mas adelantados

Es ansi de las personas: Las unas, la kavesa alta, los ojos luminozos yenos de kerensya i amor.... Las otras, la mirada dura, fiksa sovre un punto obskuro ke eyas mizmas no saven lo ke el signifika

Klara PERAHYA Judeo-Espanyol
24 Haziran 2015 Çarşamba

Djueves pasado la Prensa mos ambezo ke Myerkoles la noche en los Estados Unidos, en una Eglisya de Charleston, sivdad situada en el Sud de Carolina, mueve personas de kuero preto pyedreron la vida, viktimas de una agresyon kriminal perpetrada por un joven de kuero blanko i kaveyos klaros, al pareser serkano de una de estas kongregasyones ultra nasyonalistas de las kualas los myembros se olvidaron ke son los desendyentes de los ke antes unos kuantos siglos avian envadido tyerras ke no les apartenian.

Akto de odyo byen entendido, ma tambyen voluntad de okazyonar un djenero  de verdadera gerra kontra individuos pretos afin de mijor afirmar la supremasia de la rasa blanka.

El autor de este terrivle akontesimyento fue poko despues indentifikado komo un joven de 21 anyo, al kual (voluntaryamente o involuntaryamente, no lo savemos) el padre avia ofresido  por su aniversaryo ‘la arma ke le permetyo de perpetrar este krimen inhumano’.

Desgrasyadamente semejantes faktos devyenen de mas a mas frekuentes en el mundo oksidental i partikolarmente en los Estados Unidos komo lo atestan los kavzos de los polisyeros blankos ke travaron direktamente en direksyon de la pechadura de un preto i no de una de las pyernas, tal ke es de uzo kuando un kulpavle kere fuir..

Ay de esto 7 anyos, kuando Barak Obama fue elijido prezidente de los Estados Unidos, la mayoria de entre mozotros avia sido konvensida ke esto era no solo la viktorya del puevlo preto de ver “uno de los suyos” a la kavesera de la mas alta funksyon del payis, ma tambyen  la viktorya del puevlo de kuero blanko  de aver echo un paso de mas en direksyon de la sivilizasyon en vensyendo su vyejo prejuisyo.... lo ke desgrasyadamente no fue enteramente el kavzo.

Desde  el prinsipyo de su primer mandato, el prezidente Barak Obama se esforso de realizar dos objetivos konsiderados de su parte komo imperativos: “ la Seguridad  sanitarya para todos los sitizanos” i de mezmo  “ un kontrol severo de la vendida des armas”. Malorozamente la voluntad i los intereses del Kongreso Amerikano no le permetyo de kumplir enteramente estos dos maraviyozos proyektos.

Retornando al mizmo dia de djueves 15/6/2015,  poko mas tadre ke la primera novedad realmente trajika, la Prensa Oksidental i tambyen la İsraelyana mos ambezaron ke  el sanktuaryo de Tabgha ke es uno de los lugares sakros del  Kristyanizmo en el Estado Hebreo, fue atakado i deteryorado (horozamente superfisyalmente) por un insendyo provokado de parte de un grupo de jovenes haredim ke desharon detras de eyos la prova  ke se trata de un akto de intoleransya relijyoza, en trasando sovre una de las paredes del sanktuaryo un grafiti en hebreo inspirado por un pasaje de la Biblia ke egzije la eliminasyon de kualkyer idolo pagano.

Es ke los maestros de estos haredim no les ambezaron ke un teksto antiguo no deve nunka ser meldado de una manera absolutamente  literal,  ma segun su valor symbolika en el konteksto sosyo kultural de la epoka ande el fue eskrito?

Las autoridades İsraelyanas immedyatamente kritikaron severamente este akto illisito de profanasyon; Benyamin Netanyahu ekspreso sin tadrar sus regretos a los relijyozos Katolikos i sus severes reproshes kontra los ke fueron los responsavles . De su parte, el Prezidente  Reuven Rivlin disho: “La profanasyon de un lugar de orasyon” es un  atake a la substansya mizma de muestro payis” .

Ansi es envezes el mundo.... dos puevlos sivilizados realsados por sus savyos, ma arrebashados por aktos de horror perpetrados por otros de sus sitizanos.