La muerte de una grande dama

Judeo-Espanyol
30 Haziran 2015 Salı

La semana pasada despues de dos anyos de grandes sufriensas ke la detuvyeron enklavada a su lecho, syempre entornada de la inmensa kerensya i del infatigavle kudyo de su marido i de sus ija i ijo

Ida Dana

serro  por syempre sus ojos a un mundo ke eya amava kon fervor.

İnstalados en Washington desde largos anyos, eya i su marido Leon Dana  avian kedado todos los dos afektivamente muy atados i fideles a muestra komunidad  i venian kada anyo por dos o tres semanas al payis ke fue el du sus nasimyento  ande los asperavan nombrozos paryentes i amigos.

İda i Leon Dana fueron syempre grandes dadores i ayudadores , syempre prontos a akudir, syempre aktivos i avyertos a los otros. 

Eyos partisiparon muncho a la kreasyon de un Sentro Sefardi por ansi dezir kosmopolito en Washington kon su ermoza Kehila ande djudyos de varyos payizes orientales se enkontran, orasyonan endjuntos i komunikan. Kuando un o una estudyante de muestra kolektividad, ijo o ija de una famiya ke les era konosida o deskonosida, iva a la kapital de los Estados Unidos para kompletar sus estudyos universitaryos, el o eya resivia desde el primer Vyernes despues su arrivo, una invitasyon telefonika de parte de İda o Leon a ir ande eyos partisipar al Kidush de Noche de Shabat.

Sus kaza era kontinualmente avyerta para kuala aktividad ke fuera, karitativa, kultural o otra

 Grandes melomanos, eyos organizavan tambyen  nochadas de muzika klasika enrejistrada, ande munchos turkanos muzulmanos i djudyos se enkontravan i komunikavan asta formar un grupo de amigos muy sinseros.

Es triste, muy triste la muerte de una semejante persona a una edad konsiderada aktualmente ainda relativament manseva. Ke su Alma repoze en paz!

Sinseras kondolensas a su marido ansi ke a sus ija, ijo, inyetos i todos sus serkanos. “El rekuerdo de su pasaje sovre tyerra” kedara bivo en la memorya de munchas personas.