En los mezes pasados eskrivi bastante de artikolos sovre la kriza ekonomika, el reselo de pyedrer el empyego, la difikultad de topar un muevo echo. İ, ultimamente eskrivi sovre la “Konsensya Profesyonal”. En pensando bueno, me rendi kuento ke de una manera, en estos artikolos trati de lavoro, karyera, profesyon ets.. De sorte ke sin kererlo, se ampeso a azerse komo una seriya. Porke no kontinuarla?
En akeyos diyas, par azardo aviya tambien eskrito un artikolo sovre la nosyon “durmir”. El lektor se puede demandar ke relasyon ay entre el lavoro i el esfuenyo. Vamos a ver. En lo ke konserna muestro sujeto de oy, aki un detalyo: En diversos paises Mediterraneos, kaji tradisyonalmente, desde muncho tyempo se pratika un largo konje de medyo diya. Este sistema estuvo dando rezultados bastante pozitivos en la “produktividad”. Estamos vyendo ke, tambien syertos paises del Oeste estan adoptando el sistema konsistando a dar un entervalo de “repozo” en medyo del diya.
En un jurnal meldi un teksto enteresante, djustamente sovre este sistema, ke konosemos kon el nombre komun de “Siesta”. En realidad, durmir o si preferash el “esfuenyo” es un menester seryozo i muy natural. Tanto ke en la Kina -China, del tyempo de Mao se aviya establesido komo un derecho legal. Aktualmente en diversos ramos profesyonal, se esta rekomendando la siesta. O a lo menos un poko durmir, lo ke en turko yamamos “kestirmek”! Bueno, ke afita si por egzempyo un doktor, un ensenyante, un jurnalisto reporter, o kualkyer lavorante dezeya azer una chika siesta en medyo del diya, en medyo de su lavoro!??... Al lektor de responder!...
El Sr. Bruno Comby eskrivano del livro l “Eloge de la Sieste” -alavasyon de la siesta, esta dizyendo: “En las imensas plazaz, holdings o grande kompanias, la makina de kafé esta ramplasando el esfuenyo de medyo diya. El patron o el direktor jeneral puede serrar la puerta de su buro kon el preteksto de no kerer ser “deranjado” i puede durmir! Ma los subalternos no tyenen este derecho...”
Devemos atorgar ke munchos faktores de la vida moderna aktuala, esta arrovando de las oras de esfuenyo, espesyelmente de los mansevos. Mas i mas en los anyos de alkavo... El reselo de pyedrer el empyego, la difikultad de topar un muevo, la konkurrensa i otras razones komo por egzempyo el problema del trafiko demanyana i tadre, la televizyon, el Internet ets... Estos faktores estan akurtando las oras del esfuenyo nokturno komo tambien gastando su kualidad.
Un psikologo disho: “Kuando estash afuera de vuestra kaza o myentres el lavoro, si tenesh ambre, ser de agua o mizmo menester de ir a la tualet, ya savesh kualo azer. İ el esfuenyo es un menester natural. Ma no se deke, durmir es verguensa i mizmo defendido!!” Los espesyalistos estan d’akordo ke un kurto esfuenyo en medyo del diya, puede impedir munchos negativismos. Syertas bushkidades estan amostrando ke ansi, se konstato mas demaziya de dinamismo i de produksyon en el lavoro. Par kontra, uvo un amenguamyento de aksidentes profesyonal.
En el artikolo ke meldi aviya nombres de firmas internasyonal ke no me esto akodrando este momento. Solo ya se ke se esta tratando unas kuantas en la Japonia. En estas firmas ay kamaretas espesyal para la siesta de sus empyegados o los ke se keren repozar en medyo del diya. Ay seya divanes detras de paravanes o grande “pufes” esparzidos por aki, por aya... Siguro no ay un ovligo de durmir! El ke kere durme, el ke prefera se repoza. Ma, un fakto es serto: despues de esta “seans de repos” diremos, se esta remarkando los rezultados pozitivos en munchos domenos.
