Rabbi Shlomo Yitzhaki, yamado tambien Rashi-Rav Yitzhaki nasyo en Troyes en el anyo 1040 i muryo en la mizma sivdad en 1105. Egziste (o egzistiya) un chiko malentendimiendo konsernando el mez de su muerte.Unos afirman ke Rashi muryo en el mez de Junio myentres ke otros dizen ke fue en Julio. Yo, tomando en konsiderasyon el 8. mez, preferi azer este artikolo agora.
Troyes es una sivdad sentral de la istorika rejyon Champagne-Ardenne, situada en el Norte-Este de la Fransia.En 2005, a la okazyon del 900.anyo de la muerte de Rashi, la Direksyon Postal Franseza aviya echo la “emisyon” de un timbro en komemorasyon de este evento. Rashi fue un grande i importante komentador de la TORA i del TALMUD. El sovredicho timbro de valor de 0,50 euro, se empleo en las korrespondensyas entre la Fransia i los paises miembros de la Union Evropea.
Tambien, achakes de este evento istoriko, se publiko la İstorya de la vida de Rashi ke aviya pasado la mayoriya de su vida en Champagne. La Munisipalita de Troyas, djuntos kon el lokal İnstituto Rashi, organizaron aktividades sovre la Kultura Djudia durante el anyo entero. Debasho la proteksyon del Prezidente Jacques Chirac, se aviya realizado konferensias a lo largo de tres diyas. En desparte, este sujeto fue tomado al program de ensenyamiento de los liseos de Troyes.
Rashi, izo sus komentaryos sovre el Talmud tomando komo baza los arrekojimientos de los savyos djudios ke izyeron bushkidades antes de el. En estos komentaryos, se esta vyendo las trasas de las lisyones ke dyo Rashi en Troyes en el korso de los anyos.
Los inyetos de Rashi-Rav Shlomo Yitzhaki, eyos tambien, en diversas sivdades de Champagne, avyeron Yeshivot, sentros de estudyos rabinikos, seminaryos ande se estudyava la Tora, el Talmud i sus komentaryos. Ansi, transformaron la rejyon en un Sentro de Kultura Djudia.
Komo konsekuensa, se esta vyendo la formasyon de un grupo de eskrivanos ke tuvyeron por misyon de desvelopar, kritikar, eksplikar i propajar los komentaryos de Rashi: TOSAFOT. Es achetado ke el mas grande eskrivano de Tosafot, fue Yaakov Ben Meir Tam, uno de los inyetos de Rashi.
En este teksto kije dar una kutra dokumentasyon sovre Rav Shlomo Yitzhaki. Si no me yerro, en el “Şalom antes unos kuantos anyos, (probavlemente en 2005) uvo en turko una chika novela sovre este sujeto.
En mi proksimo teksto penso dar un pasaje de la vida de la vida de Rashi. Es un kuento o una leyenda, si preferash keridos lektores. Es lo ke es, es un epizodyo bastante enteresante.
A kontinuar...
