En muestro pais i en el mundo entero, el terrorismo esta kresiendo de diya en diya. Poko tiempo antes los atakes ke se produsieron en Paris, en Ankara i en munchos otros lugares, mos destrozo (empresyono) profondamente.
Este mez era tambien el 12. aniversario de los atakes ke sufrio muestra komunita el 15 Novembre 2003, en muestras dos sinagogas.
Kerida Rozi, en tanto ke una madre ke piedro su kerido ijo Yoel en los atakes, tu fuites un portreto diferente de lo antisipado. Al lugar de serrarte, sinyates a diversos proyektos en muestra komunita, lo mas por los mansevos. Ya se ke kreatesh un fondo en su nombre. Me puedes kontar ke proyektos realizatesh?
Muestra buto (intension) es de organizar aktividades a los mansevos, para fortaleser la konsiensia de sus identidad Judia, tambien para kontribuar a sus desvelopamyento personal.
En esta intension, dimos seminaryos (konferensias) al sujeto del antisemitizmo, de la asimilasyon, de la kultura Judia i similaryos.
Publikimos tres livros sovre la kultura i la istorya Judia i los distribuimos a los mansevos.
Estamos azyendo aktividades de Şn de semana, komidas de shabat i de sukka para ke se konoskan i ke se engleneyen endjuntos, en ambezandosen muestra kultura i selebrando las Şestas.
Tambien estamos organizando viyajes en Turkia i entanjero. Realizimos viyajes en Israel spesyelamente para los mansevos ke no la konosiyan, ansi, mas de 300 mansevos tuvieron la posibilitad de ver i de koneser la tierra santa.
Todas estas aktividades, estan ayudando a la koneksion de los mansevos kon muestra komunita, i entre eyos. I para fortalesar sus identidad Judia.
Por el 10. aniversario de los atakes, empesatesh un proyekto muevo ke lo yamatesh “Ineni”. Ke es “ineni” i ke es el kontenido?
“Ineni” kere dizir yo esto aki. Yo esto aki para kontribuar a muesta komunita, para no olvidar mi pasado, para krear konsiensia i azer todo lo nesesaryo.
Kolaborimos kon los mansevos de todas las institusiones i asosiasiones, en este proyekto. Ansi pudimos aumentar konsiderablemente la partisipasion a las komemorasiones i selebrasiones.
Indemas, estamos en kolaborasyon kon muestra eskola para krear un sistema de ensenyar a muestras kreaturas la istoria de la komunidad Judia de Turkia. Muestro eslogan es: “No puedes dirijar tu futuro, sin saver tu pasado.”
Kuolo es el sekreto de vuestra reushita?
El sekreto es de lavorar kon muncha kerensia. Tener un dialogo kayente kon eyos mos da ardor. Konoserlos de serka mos da la posibilidad de ver sus nesesidades personales i de ayudarles .Eyos son mis ijos, mis amigos.
La reushita no es el destino, es el viaje en si mismo.
Kuando te kreyes a lo ke azes, estas reushendo. I kuando estas reushendo, te estas kreyendo ke puedes azer mas.
Kualo te esta entuziasmando lo mas?
Ver ke estamos tokando a sus vidas. Munchos mansevos dizen ke sus vida se troko despues de partisipar a muestras aktivitas. Lo mas en el estudyo i en sus entorno sosyal.
Şsta agora, sienes de mansevos konesieron muevos amigos. Lo ke me gusto lo mas es ke tenemos mas de diez kuples ke se renkontraron en los viajes o aktivitas i ke se angajaron o se kazaron. Ke puede ser mas emosyonante ke de ser testigo de boda?
Kerida Rozi, esto viendo ke tus ojos estan briyando de la emosyon en avlando. Me puedes dizir komo topates esta fuersa?
Lo ke me dio fuersa fue Yoeliko mismo. El saviya ke ser oŞsial de seguridad era muy danjerozo, pero nunka no renunsio i kontinuo a korrer detras de sus ideales.
La mijor repuesta au mal ke mos izyeron, es de amostrar ke tenemos bastante koraje i ke no mos pueden destruir i eksterminar. Mozos estamos kontinuando la mision de Yoel.
El dezeo ke su nombre biva para siempre me da kada dia mas i mas fuersa.
El Fondo de Yoel Ülçer oy es una grande famiya kon 30 mansevos voluntaryos ke ayudan a realizar los proyektos i kon mas de 600 mansevos ke partisipan.
