En unos kuantos dias sera la fyesta de Pesah. Byen entendido, kon grande prisa las balabayas de varyas kazas i sus ayudantes ya empesarian a aparejar el Seder de la primera noche, kon su varyedad de simbolos kada uno kon su signifikasyon propya: el pan ke no tuvo el tyempo de levdear i ke yamamos ‘Masa’… las yervas amargas ke untamos en el vinagre, reminisensya de los dias pretos de ambrera … el ‘Harosi’ meskla dulse de frutos ke los ke fuyeron kon prisa del payis de la sevidumbre no tuvyeron la oportunidad de azer kozer. No kale olvidarmos tambyen los guevos enhaminados por la mas parte de kolor mas o menos obskura, buyidos kon kashkaras de sevoya en la agua de kochura… İ, grande alegria, ‘los Birmuelos’ ke munchas vezes komemos empapados de asukar derretida.
No ay muncho de esto, en varyas famiyas, noche de Pesah se deshava una sia vazia al torno de la meza i la puerta de kaye entornada, provablemente kon la esperansa de ver surjir el profeta “Elie” de retorno sovre tyerra , o puede ser mas simplemente un buen djudyo sin kaza ni morada, ambyerto o asedado ke demandara hospitalidad por unas kuanta horas, lo ke inkontestavlemente es un pensamyento kaji sublime, ande se topa la inegualavle solidaridad djudia.
“Todos los ke tyenen ambre vengan i paskuen” dizian muestros padres. Ya se ke oy en dia todo esto ya troko sin esperansa de retorno, ma mizmo en savyendolo no me puedo detener de repetarlo…
Ansi, Pesah alegre keridos lektores!…dias yenos de esperansa para todos en el mundo, de ke fey ke sean, djudyos, muzulmanos, kristyanos i mizmo paganos o atheistos, todos “kriansas humanas, ovra sublime de Dyo”.
Ke en el mundo entero, en kada korason humano espunte un mizmo dezeo de paz i ermandad!
A remarkar ke Pesah es la epoka de varyas ermozas aktividades, la rekolta de munchos produktos de la tyerra, legumbres i frutas de enverano, las primeras serezas i las primeras prunas por la mas parte vedres, kon laskualas muestras nonas azian el kaldo de abramila para el pishkado de las noches de shabat, kaji invariavlemente sifyo o gaya.
Pesah, para mozotros djudyos, es prinsipalmente la komemorasyon de la salida de Ayifto, de las primeras horas de libertad de ombres i mujeres ke fueron suplisyados debasho la kruel dominasyon de los faraones, los kualos syempre los izyeron bivir en el espanto de tomarles por syempre sus ijos…
Pesah igualmente es el rekuerdo del milagro de sus pasaje de la Mar Kolorada sin undirsen en sus olas furyozas, tal ke fue el kavzo de los ayiftsyanos ke, kon ravya i ferosidad, kijeron persigirlos sin rezultado.
De mezmo, Pesah es la rememorasyon de los kuarenta anyos ke muestros antiguos avuelos pasaron en el dezyerto, giados en sus enkaminamyento por las nuves ke se topavan en el syelo.
İ antes de todo, no mos olvidaremos ke “Pesah” es la reminisensya de ”los Dyes Komandamyentos” ke Moshe Rabenu resivyo de Dyo para ser transmetidos al puevlo djudyo i a la humanidad entera.
En el “ Dekalogo” los komandamyentos son imperativos. Eyos sin dubyo konstituen la baza de la verdadera sivilizasyon ande Dyo (syempre en su sakralidad) no es la unika entidad ke devemos respektar, ma tambyen kon El, ‘todas las kriansas humanas’ en sus varyedad, kada una venida de un lugar differente ma todas habitantes de la mizma tyerra i debasho el mizmo syelo.
A notar ke en este mizmo Dekalogo, las kuatro primeras rekomendasyones konsernan ‘El Bendicho sea su Nombre’ i las sej otras “el Ombre en su kondisyon de simple mortal”.