YOM HASHOAH - El dia de rekuerdo

Dora NİYEGO Judeo-Espanyol
4 Mayıs 2016 Çarşamba

Yom HaShoah (El Dia de Rekuerdo) se obzerva en İsrael i en la Diaspora komo el dia de la komemorasion de los sej miliones de Judios ke murieron en el Holokosto, i por la resistensia judia en este periodo. En Israel, es un dia de komemorasion nasional.

Este dia fue akseptado en İsrael komo un dia de komemorasion en el anyo 1953, kon una ley afirmada por el primer ministro de Israel, David Ben Gurion, i el Prezidente de Israel, Yitzhak Ben-Zvi. El  27 de Nisan (avril / mayo) fue akseptado komo Yom HaShoah ma si el 27 kaye en un dia de Shabbat, la komemorasion se aze al dia suivante.

La primer propozion por esta ley, fue de komemorar Yom HaShoah en el 14 de Nisan, ke es el aniversario del revolto del Geto de Varsovia (19 de avril, 1943), ma este dia no fue akseptado porke el 14 de Nisan kaye un dia antes de Pesah. La data fue trokada al 27 de Nisan, ke es ocho dias antes de Yom Ha’atzma’ut, ke es el Dia de la Endependensia de Israel.

La majorita de las komunidades judias azen una seremonia en este dia, ma no ay un ritual akeptado por todos los Judios. Se asiende kandelas komemorativas, i se resita el Kadish (la orasion por los ke murieron) en todas las las komunidades judias. El movimiento konservativo de Israel, aparejaron una Meguila ke se deve meldar en el Yom HaShoah. En el anyo 1984, el rabino David (konservativo) eskrivio un artikolo en la revista jurnal konservativo ke kale kale meter un program fikso ke se deve obzervar en los dias de komemorasion.

En İsrael, a las diez de demanyana, las sirenas empesan a sonar. Los shofores salen de sus otomobiles i se estan kayados en pies dos puntos, fin ke las sirenas se aretan. En Israel, Yom HaShoah empesa una noche antes. Se aze una seremonia en la Plaza del Geto de Varshova en Yad Vashem en Yerushalaim, i se komemora los Martires i los Eros (kahraman). En la seremonia, la bandiera nasional se abasha a media. El prezidente İ el primer ministro dan deskorsos. Los sorvivientes del Holokosto asienden sej torchas ke sembolizan los sej miliones de Judios ke murieron en el Holokosto, i los Grandes Rabinos resitan orasiones. Tambien, se aze seremonias en las eskolas, las bazas militares, i en las oranizasiones

Una noche antes de Yom HaShoah, i en el mizmo dia, lugares publikos de entretenimiento deven de estar serrados, komo es en la ley. La televizion israeliana transmeta programes dokumanteres i programes sovre el Holokosto. En la radio, se mete kantikas tristes. Bandieras en los edifisios publikos deven de estar abashadas a medio.

Judios en la diaspora pueden obzervar este dia ariento de la sinagoga. Komemorasiones se azen en las sinagogas i en las organizasones judias. Se apareja programes edukativos por los mansevos. Si ay un desendiente de un sorviviente del Holokosto en akeya komunidad, el apareja una lektura. Se apareja resitasiones de los psalmos, kantikas, i lekturas apropiadas. A las vezes, se mete un filmo del Holokosto. Algunas komunidades, para enfatizar (vurgulamak) la profondidad de la pedridad de los Judios en el Holokosto, meldan los nombres de las viktimas del Holokosto, uno  detras del otro, dramatizando la pedridad de los sej miliones de muertos. En munchas eskolas judias tambien, se apareja programes edukativos sovre el Holokosto .

En el dia de oy, miles de estudientes en İsrael i en la Diaspora, azen un servisio memorial en Auschwitz, ke se yama “La Marcha por la Vida”, por amostrar el kontrario de las marchas de la muerte del Holokosto. Este evento es aparejedo por el Ministerio de Edukasion de Israel, i la Konferensia de Reklamasiones del Holokosto, i se considera komo una parte emportante del plano de los estudios de la eskola – komo el klimaks (doruk) de los estudios de siete mezes sovre la Segunda Gerra Mondial, i el Holokosto.