Balak

Rav Yeuda ADONİ Köşe Yazısı
21 Temmuz 2016 Perşembe

Los ijos de Israel vinyeron a el luguar nombrado Arvot Moav, enfrente de la sivdad Yeroho. Este paso ke dyeron los ijos de Israel, i las viktoryas ke estavan ganando kon la ayuda de Kriyador, izo retemblar muy muncho a el puevlo de Moav. Los moradores de Moav kijeron venserlos a los Djudyos kon unos remedyos afuera de la natura.

Sovre esto, el rey de Moav Balak se akonsejo kon el puevlo de Midyan ke manera azer por kitar de el mundo a el puevlo Djudyo. Desidaron entre eyos de mandar a yamar a Bilam el echizero ke morava en Peor por ke maldiga a los ijos de Israel. Mandaron unas grandes personajes de la sivdad de Moav i de la sivdad Midyan i viyenen onde Bilam, i le rogan al nombre del rey de Moav Balak de vinir kon eyos a la tyera de Moav, i maldizir a los Djudyos. Las personas ke mando Balak le dizen a Bilam, “nuestro rey Balak esta muy sigura ke a ken maldizes es maldicho, i a ken bendizes es bendicho”.

Bilam les dize ke el no es un echizero si no ke es una profeta ke esta debasho de el orden del Dyo Santo, ke esperen una noche i el les respondera.

El Dyo aparese su vizyon a Bilam i le demanda: “Ken son estas personas ke vinyeron onde ti?” Bilam le responde ke son mandados del rey de Moav por ke vaya i maldiga a Israel. El Dyo lo defende de ir a maldizir a los Djudyos syendo el puevlo Djudyo ya es un puevlo bendicho.

A la manyana les dize Bilam a los mesajeros ke se tornen a sus luguar, ke El Kriyador no lo desho ir kon eyos. Balak le manda otras personas i mas onoradas i le promete muncha plata i oro de azerle todo lo ke demando. Bilam ke sintyo estas prometas de el rey Balak, los detyene a los mesajeros una noche i va se enforma, lo ke va kerer el Dyo de avlar.

El Kriyador se aparese otra vez a Bilam i le permete de irse kon eyos onde Balak. Ma a kondisyon ke no puede avlar mas ke lo ke le va ordener el i El Kriyador. Bilam, a un ke ya entendyo byen ke la veluntad del Dyo es bendizir a el puevlo Djudyo, i no maldizirlo kon todo la esperansa de la buena paga i de la muncha onra ke tyene ke resivir de Balak. Lo izo yerar, i se levanta kon muncha  kovdisya i se va kon las personas de balak.

Bilam no reusho a  maldizir a el puevlo Djudyo, syendo ke no lo desho El Kriyador ke maldiga a el puevlo Djudyo si no ke los bendicho a el puevlo kon estos biervas.

“O puevlo Santo de Yaakov, kuantas ermozas i buenas i onestas son tus tyendas, i tus moradas.”