Es esta semana dimos karar de trokar las oras del Muzeo Djudio de muestra sivdad. Es djusto ke los ke lavoran en un establesimyento tienen derecho de repozarsen. Ma despues ke los “mall”es de emplear se avrieron en los kuatro puntos del mundo, todos no saven mas el diya ke se deven de repozar. Un syerto era haver de una botika ke se topava en un shoping-mall, ke bela deve de ser avyerto dodje oras al diya i syete diyas kada semana. Es muy yuch para los ke lavoran i para los patrones. Ma en el museo no fue este modo. Todos los ke lavoran resivyeron kon entendimyento (anlayışla karşılamak) este trokamyento. Diyas de Alhad serravamos el Museo a las dos despues de medyodiya. Esta semana empesamos a estar avyertos asta las kuatro i media komo los diyas de la semana. I kada semana pensamos de organizar un konserto, una konferensya o un filmo kurto. Esta aktivitad se va realizar entre las kuatro i sinko. I los ke vinyeron al muzeo puedran vijitar de las dyes de la demanyana asta las kuatro de la tadre. Esta semana vamos a tener un konserto de kuarenta i sinko puntos del koro Nes enkavesado por Izzet Bana. Vos estamos asperando a las una, a las dos mizmo a las tres para vijitar el Museo i dospues para asistir al konserto.
No era la semana nesesaryo para eskrivir esto. El sujeto el mas emportante ke se deviya de tratar era el evenimyento ke se realiso en la Mueva Zelanda diya de vyernes. Es esta demanyana en indo al echo ke empesi a oyir en la radio, lo ke un loko – no tengo derecho de dizir un assasino - reusho a matar kuarenta i mueve almas de tres anyos asta setenta i un anyo. Malorozamente komo semos una komunidad ke konosemes este modo de matansinas mos toka mas muncho. Mos akodramos dainda lo ke afito en el anyo 1986. Mas de vente almas fueron matados en la Keila de Neve Shalom. I la vida de muestros korelijionarios troko. Se olvidaron de tener una keila kon una guerta. Tuvyeron un alay de problemes para fyestar la fiesta de Sukot porke era mas difisil de pueder montar una Suka! Estamos muy tristes kon este evenimyento i savemos ke ay mas de kuarenta personas feridos ke estan en los ospitales. Esto es reelmente un malor para la umanidad. I malorozamente oy en diya kon el komportamyento de los prezidentes i los ministros, los lokos estan tomando koraje para pueder azer kozas asemejantes.
