EMOR

EMOR

La perasha Emor nos da a entender la enkomendansa de santefikar el nombre de el Kriyador. ‘Kidush Ashem’ komo esta dicho: No esbivles el nombre de mi santedad, i sere santefikado entre el puevlo djudyo. Esta enkomendansa es una mitsva ke devemos afirmarla todos en kada momento. El savyo grande, Arambam dize, tener la kreyensa en el Kriyador i esperar todo de el, es santefikar su nombre.

En la bibliya meldamos: Hananya, Mishael, i Azary, los amigos de Daniel fueron echados a el fuego, por el nombre grande del Kriyador, i fueron salvados kon los milagros ke izo el Santo Bendicho, El.

Tambien la perasha trata por la santedad de los Koanim. Las Koanim no se deven enkonarsen en ninguna manera. El puevlo deven de onorar i santefikar a los Koanim. Komo lo vemos en la alaha, eyos deven suvir primeros a la Tora. Kuando egzistiya el santuvaryo, los primeros frutos de los kampos i vinyas, los primeros frutos de las ovejas apartenian a eyos.  Ansi ke el Koen Gadol deviya ser amigo i ermano de todo el puevlo.

Tanbien en la perasha meldamos detalyes tokante a las fyestas djudiyas. Diya de Kipur es diya de perdonansa para la nasyon djudiya. Tokante a el diya de Kipur dizen nuestros savyos si alguna persona pensa de pekar anyo entero, Kipur el ya va ser perdondo, siguramente se yerra. Sino ke deve de arepintirse i azer teshuva i deshar su pekado i no repetarlo mas.

El Kriyador es piadozo; El se apiada de sus kriyansas i nos perdona. Ma, las kulpas ke akometimos verso muestros amigos o keridos o verso alguna persona, devemos de demandar pardon ke nos perdonen, estonses nos perdona el Kriyador.

Tokante la fyesta de Sukot, ansi lo meldamos en la Tora, syete diyas devesh de morar en las kavanyas (Sukot) por ke sepan vuestros ijos ke en las kavanyas (Sukot) vos ize morar kuando vos kiti de Mistrayim. Moshe Rabenu ekspliko en la Tora kada fyesta i fyesta de aki nos enbezamos ke se deve de repetar i avlar las reglas, la estorya i los kustumbres (uzos) de kada fyesta en su tyempo. Tambien la perasha kontinua el sujeto de kontar ‘Omer’ kuarenta i mueve diyas ke es syete semanas de kontar de Pesah asta Shavuot.

Los Koanim son los ke aserkan el puevlo verso el Kriyador. Los korbanot, los sakrifisyos enaltesen a el puevlo. El dover de los Koanim en el tyempo ke egzistiya el Santuvaryo era tambien de edukar a el puevlo, i arelumbrar a el puevlo kon la luz de la Tora.

 

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın