kanada REklam

Lingua biva o no

La semana pasada un amigo Ermeni ke es el prezidente de una fondasyon de una eglisia en un kazal del Bosfor; de la eglisia de Boyacıköy me telefono demandandome la traduksyon de un teksto en judeo-espanyol. No se si esta eglisia tyene munchos adeptos ma la fondasyon es muy emportante porke tiene un prezidente muy kapache. El ke tiene una botika ande vende todo modo de djoyas en oro en el Merkado de las Episias (Mısır Çarşısı) pasa buen karar de tyempo para realizar prodjektos sovre los Ermenis i las minoridades ke biven en Estambol i en muestro payis. Esta realizando estos prodjektos resivyendo fones de la Union Evropea. Reelmente es un ombre muy kapache. Es el primer ke reusho a resivir moneda kon un prodjekto ke fue achetado.

I kuando me bushko la semana pasada me demando si puediyan transladar un teksto en turko, en judeo-espanyol?

Pensi dos puntos i le dishe kon grande plazer SI. I en  unos kuantos  puntos embiyi un whatsapp al grupo de la asosyasyon del Sentro Sefardi. I en dyes puntos la mas manseva de este grupo, Selin Toledo embiyo un mesaj ande eskrivyo ke puediya realizar esto. Sin pensar un punto acheti i dishe al sinyor Nazar lo ke deviya de pagar.

Esta noche (noche de lunes) el echo se eskapo i esto muy kontente de ver ke una manseva realizo un echo asemejante. (Selin bivyo unos kuantos anyos en la Espanya)

Es esta semana ke meldi en un artikolo (me parese en uno de los grupos) ke dainda en el mundo se topan serka de 100.000 judeo-espanyol avlantes. No se lo ke deve de sinyifikar, ma dainda es emportante de ver una populasyon asemejante ke avla muestra lingua. Kreo ke la mas grande partida de esta populasyon moran en Israel. Malorozamente esto konstatando ke malgrado ke Israel no es dirijida por los Ashkenazes, los Sefarades no son bastante poderozos para fortifikar sus kultura. Si un governo no toma esta responsabilidad, no puedemos adelantar esta lingua i kultura. Mozotros, una dizena de personas, kualo es lo ke puedemos azer?

 En el muzeo djudio de Estambol estamos lavorando para realizar una seria de demonstrasyon de filmos sovre los Djudios Turkanos, sovre muestra kultura, sovre faktos politikos i istorikos konsernando muestra istoria i kultura. Esta noche en muestra seduta se propozaron mas de 25 filmos. Reelmente estava muy kontente de ver esto todo.

Keridos lektores, de las kuatros partes del mundo si tenesh la posibilidad de propozarmos syertos filmos, estamos prontos a sintir i eskuchar vuestras propozisyones.

Ya puedesh eskrivir estas propozisyones al mail: info@muze500.com

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın