kanada REklam

El Dia De La Kultura Djudia Evropea

El Dia De La Kultura Djudia Evropea

Ay kaji dos mezes ke tornimos de la kampanya. Djusto ke dishe un oh ke ya me enstali i va tener mas muncho tyempo para ver a los inyetos, me vino un telefon ke esto kargada de un dover.

Demandi:

- Yene kualo ay

- Al 24 NOVEMBRE vamos a fyestar el dia internasyonal YKAG. (YAHUDİ KÜLTÜRÜ AVRUPA GÜNÜ) I tu tyenes el dover de reprezentar una boda teatral.

- Yene boda????

- Si… ayde aparejate esto es tu echo.

Antes ke diga si u no ya lo serro el telefon. Digamos yo no me va ambezar a dizir no. Mis amigas me dizen “ayde a ti ya te plaze”. Siguro ke me plaze; sin plazer no se aze nada sovre todo benevol. Ma penso ke ya lo puedo azer, deke ke no ayude i tanto ke puedo i esto sana nunka no va dizir no. Kurto me aremengi las mangas i empesi a bushkar en primero novyo i novya ke es lo mas difisil. Porke malorozamente komo estan muy muy okupadas la manseves de oy, no keren angarya. Parte de novyo, parte de novya, kavalye para la madre de la novya porke el padre va entrar kon la novya, ijika de kola, kortej, demoiselles d’honneur, buketo para la novya, rozas para las yakas de los ombres i rozas para las demoiselles d’honneur. Orozamente ke tengo un grupo ke me ayudan i nunka no me dizen no. La parte del novyo no troka; yo syempre eshuegra, eshuegro mi kerido amigo BENO LEVİ. Este anyo los kos.huegros trokaron, el rolo de padre i madre de la novya empredyeron HENRY i YILDIZ CHİPRUT. Esto muy oroza de tener kos.huegros mansevos.  Lo mijor del diya fue el aniversaryo de kazamyento de los novyos. BENSİ i CENİ ELMAS kazaron antes 28 anyos en el 24 novembre i fue una koensidensya de selebrar todos endjuntos en kazandolos de muevo.  Un poko me kansi, komo dize el proverbo “sin un poko de penar no se topa plazer”, la boda fue byen reushida i yo kazi ijo por la sejena vez!

 

 

 

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın