Alhad la noche vamos a asender la primera kandela de muestras Hanukiyas. En esta semana de Hanuka tenesh el mazal de asender las kandelas de la Hanukiya kon muncho kalabalik en diferentes lugares. Lunes a la tadre en el Templo de Neve Shalom tenemos un konserto organizado kon las dos emportantes komunidades: Neve Shalom, la Komunidad la mas emportante de los Sefardim i la Komunidad Ashkenazi. Es kreo ke el Rav Mendy Chitrit de la Komunidad Ashkenazi ke izo syertos esforsos para realizar esta nochada. Es el konserto del kantador Cenk Rofe kon el Burstein’s Klezmer Basement. Kreo ke los miembros de muestra komunidad van a segir este konserto kon grande plazer.
Martes a la tadre en la Sinagoga de Caddebostan despues de un kokteyl organizado, vamos a pueder asistir al konserto de Sami Levi ke era el solisto del Grupo Sefarad i ke kanta solo oy en diya. En el mizmo program vamos a oyer las Estreyikas d’Estanbol: los chikitikos ke fueron edukados por İzzet Bana. I este konserto va ser dirijado por el maestro Yusuf Ceki Sağlamlar. En la mizma Sinagoga la Talmud Tora va fiestar su aniversaryo, Alhad el 29 desembre despues de la tefila.
Diya de alhad el 22 desembre, la primera fiesta va ser realisada en muestra eskola de Ulus. El mizmo diya el Rav Mendy esta organisando kon las kriaturas una aktivitad en Vadi Istanbul. I la aktivitad va ser nombrada “Hanukah on Ice”. Ya vos puedo dizir solo ke esta aktivitad se va realizar despues de midi.
Ya vos paresyo ke es solo estos evenimyentos ke se van a realizar. No, no es djusto. El 26 de la mizma semana, mos vamos ir a Gaziantep para una orasyon – por la primera vez una orasyon en esta Sinagoga ke fue restorada sinko o sesh anyos antes – en la Sinagoga de Gaziantep. Avli kon el sigundo presidente, İzak İbrahimzadeh para ir el mizmo diya a Kilis serka de Gaziantep ande la Direksyon de las Fondasyones termino una restorasyon muy emportante en la Sinagoga de Kilis. I reelmente kero ver lo ke realizaron. Muestros amigos ke vijitaron esta sinagoga estavan muy kontentes de lo ke se izo.
El 28, Shabat la noche, si no trokaron de idea vamos a partisipar a la orasyon de Arvit en la Sinagoga de Neve Şalom i despues a las 19.30 vamos a asender las 8 kandelas de la Hanukiya en la Kula kon el Mayor de Beyoğlu. Reelmente va ser para mi una nochada yena de emosyon. No nasi en este kuartier ma kreo ke oy en diya es el kuartier el mas emportante en la istoria de los Djudios Istanbullis. I kon el Museo Djudio de Estanbol estamos azyendo un projekto sovre los Djudios de la Kula. A la fin si tenemos bastante moneda i pasensya vamos a azer una ekspozisyon, un livro i mizmo un filmo. De ke no meter una foto ke se va travar en esta nochada de alhad (28 Desembre 2019).
Para eskapar ya se ke el Rav Nafi Haleva kon la Sinagoga de Ortaköy diya de alhad el 29 de Desembre van a organisar un parti en el Hilton – Maslak – en este diya i kreo ke muncha djente van a partisipar a este parti de Hanukah. Kreo ke muestra komunidad es por la primera vez ke esta organisando mas munchas aktividades ke las kandelas de la Hanukiya.
Hag Hanuka sameah.
