Ay poko tyempo de esto, meldi ke en Fransya un relijyozo kristyano fue matado en estado de orasyon en su propya Eglisya, por un grupo de terroristos ke se referavan al Koran i al Djihad.
İ, por un largo momento me senti toparme, munchos anyos antes en el pasado, kuando una manyana de Shabat del anyo 1986 en Prinkipo uno de muestros amigos vino en koryendo prevenirmos ke la Sinagoga Neve Şalom avia sido atakada por un grupo de terroristos ke tenian las karas eskondidas debasho kapushones pretos, kavzando la muerte de kaji 20 de muestros ermanos i deshando en basho munchos otros feridos, entre los kualos unos kuantos ke eran atados a la Matan Baseter.
Era kaji el primer kavzo de terrorizmo en muestra sivdad i mos era muy difisil i mizmo kaji imposivle de entender la razon de este akto no solo feros ma tambyen absurdo…. Deke matar inosentes las manos desnudas implorando el pardon i la klemensa divina?
En mi kualidad de myembro de la Matan Baseter, me senti por seguro ovligada de korer ver lo ke se pasava kon los ke avian sido gravemente feridos i poko mas tadre tomi el primer vapor para Karaköy ande se topavan igualmente tres mansevos djudyos ke yo konosia de leshos i ke avlavan del mizmo kavzo; entonses les demandi la razon por la kuala eyos interrumpyeron sus aktividades rekreativas de fin de semana : sus repuesta fue muy simple: “se puede tener menester de sangre manseva para los ferridos.’’
No pude nunka olvidarme estas maraviyozas palavras de solidaridad de los tres jovenes, komo tambyen no me puedo olvidar todos los ke mas tadre, al perikolo de sus propya vida, izyeron todo lo ke era posivle de azer afin de salvaguadrar la vida de los ke orasyonavan adriento la Keila.
Aktualmente, segun lo ke mos ambeza la prensa evropea, ‘el ultimo asalto terroristo ke kosto la vida del grande relijyozo kristyano en estado de orasyon’ desperto la ravya i la horror no solo de la mayoria del puevlo fransez, ma sovre todo de los muzulmanos fransezes, los kualos syenten ke estos aktos kriminales los arrebashan eyos mizmos i arrebashan el prestijyo de sus Fey.
Ansi, oy en dia, dospues de un largo periodo de silensyo, munchos de los dirijentes i grandes personalidades de la totalidad de la komunidad muzulmana de Fransya tomaron konsyensya de sus propya responsavilidad ke los ovliga a luchar personalmente afin de meter fin a una situasyon trajika de la kuala eyos son las primeras viktimas.
I, ay de esto poko mas de una semana, Alhad el 31 del mes de Julyo el hebdomadaryo franses nombrado ‘Le journal du dimanche” publiko la novedad ke despues el horrivle asasinato del vyejo relijyozo kristyano, mas de kuarenta altas personalidades muzulmanas feridas espiritualmente en sus dinyidad relijyoza, publikaron la sigyente deklarasyon : “Mozotros Fransezes Muzulmanos semos prontos a asumir muestras responsabilidades facha al horrivle terrorizmo islamiko……”
Komo dicho mas arriva, una semejante desizyon ya se asperava desde un largo tyempo i byen entendido eya fue muy apresyada por la mayoria de los fransezes, a la eksepsyon de la komunidad djudia ke ekspreso su grande desepsyon de no topar entre los golpes de terrorizmo ke fueron enumerados por la komunidad Muzulmana, los ke apuntavan partikolarmente la fraksyon djudia de Fransya.
En la deklarasyon muzulmana fueron mensyonados: los atakes perpetrados kontra los karikaturistos de la revista “Charly Hebdo” sin avlar del “hyper- kasher,” fueron tambyen mensyonados los golpes kontra dos polisyeros matados sin razon, ansi ke kontra grupos de jovenes en sus divertimyentos esportivos o muzikales i no los golpes asasinos kontra los djudyos tal el horrivle akto kriminal de tres anyos antes kontra la eskola djudia de Toulouse ande un adulto i tres ninyos İsraelyanos pyedreron la vida… no fueron de mezmo mensyonados el desgrasyado drama de Halimi, ni los multiples otros attakes mortales o no kontra djudyos en Grenoble i en varyos otros lugares de Fransya…
Es ke fue un Olvido involuntaryo? La kestyon keda sin repuesta.
En todo kavzo, el Grand Rabbino de Fransya Rav Haim Korsya deklaro ke el fakto de no mensyonar las terrivles trajedias de Toulouse i del HyperKasher de Vincenne fue un kavzo grave i partikolarmente dolorozo, lo ke fue tambyen repetado kon otras palavras de parte de kaji todas las İnstitusyones djudias del payis i del djornalisto filozofo muy byen konosido Bernard Henri Levy.
Poko mas tadre, unas kuantas personalidades muzulmanas ekspresaron sus regretos i aseguraron la komunidad djudia de sus amistad.
Fue lo ke fue, en todo kavzo en este momento lo mas importante es la kestyon: Ke sera el argumento prinsipal ke la komunidad muzulmana de Fransya va utilizar afin de pushar sus jovenes i adolesentes en direksyon de una lektura rasyonal i no nihilista del Koran? Una lektura ke no sera radikal ma ke tomara en konsiderasyon la epoka i las sirkunstansyas durante las kualas semejantes preseptos fueron formulados.
