Martes de la semana pasada la pajina en Judeo Espanyol del Şalom ya estava yena de la totalidad de los artikolos uzuales, pronta a ser publikada, kuando personalmente, a la sigida de un golpe de telefon de una amiga, me ambezi por hazardo la muerte de Meir Gaon.
Por un largo momento me topi en un estado de estupor, komo si una mano de fyerro me avia dado un punyo en la kavesa…Lo savia desrepozado ma no en estado de gravidad mortal….mansevo de 67 anyos, de estatura ancha i fuerte, el paresia syempre ser komo un luchador pronto a venser kualkyer golpe enemigo.
Kon su maraviyoza simplisidad, kualidad muy rara en muestro tyempo i su saludo syempre empapado de kudyo, el reprezentava para mi un real amigo. Aun muestra diferensya de edad de a lo manko 30 anyos, el envezes me yamava ‘klarika’, no komo una burla, ma komo un sinyo de kerensya, tal ke lo azeria un ijo o una ija.
Muestro kerido amigo Silvyo Ovadya ya vos enumero la semana pasada las ke fueron (en desparte de sus responsabilidades de ombre kazado i padre de famiya) las varyas aktividades del defundo en muestra kolektividad…. myembro aktivo de la Fakirleri Koruma derneği, kon a syertos momentos la responsavilidad de varyas realizasyones muy importantes, Gabay de la Sinagoga de Burgaz i otras misyones sosyales, el syempre fue muy atado a sus doveres humanos, komo tambyen al kumplimyento de las mitsvod de muestra Ley.
El metrizava perfektamente la lingua franseza i era un ferviente adepto del estudyo de varyos koryentes filozofikos, ansi el azia parte de un grupo de muestros korelijyonaryos ke se rekojian los dias de Shabat despues de medyodia para diskutir sovre el djudaizmo i su profunda sagasidad.
Meir Gaon todo en kedando kaji syempre un ombre muy fidel a los preseptos relijyozos de su fey i en kumpliendo la mas parte de los doveres ke konstituen la baza imperativa de muestra relijyon, supo tambyen ser un ombre de su epoka, avyerto a los grandes problemas internasyonales i atentivo a las varyas trajedias ke perpetualmente obskuresen el horizonte de la atmosfera mundyal.
Avia en el un maraviyozo sentimyento de filantropia i so segura (bazandome sovre las chikas konversasyones ke tuve la okazyon de tener kon el) ke ‘su kudyo por el otro ke si mizmo’ no se limitava a ansyearse unikamente por sus propyos paryentes o amigos, ma tambyen por kualkyer otro humano en estado de difikultad.
En un mundo kaotiko ande la luz i las tinievlas paresen mesklarsen la una a las otras de una manera inekstrikavle, Meir Gaon, kon su ermoza simplisidad i su amabilidad natural, mos desho el egzemplo de ’una manera de bivir’ empapada de humanizmo, ke no nesesita ni hadras ni falsas demostrasyones.
Ke su alma repoze en paz. Amen!
