Daniel Wildenstein konta...
“Kuando se dize ke se ama el arte, se evita de desfigurar las maraviyas del patrimonio universal.”
Mi padre eskrivio un artikolo sovre Andre Malraux, diziendo komo siempre ke lo admiro komo un grande eskrivano. Despues de los komplimentos, mi padre no se pudo abstener de azer aluzion al epizodio de Marseille.
Mi padre supo ke las skulpturas, ets. se kedaron poko tiempo en el atelier de un skulptor de Marseille. Malraux le avia demandado de kortar las piedras, de makiyar los objetos de arte.
Para mi padre era un komportamiento ke no se puede admeter. Es un akto grave ke no se pardona, afrozo i meskino.
Esto era lo ke papa avia eskrito.
Evidentemente, Malraux lo niego... Fantaziyo komo tenia la abitud de komportarse en su vida. I esto era parte de su enkanto/sharme… Ma no pudo dijerar ke alguno se estava opozando a el...
Antes de kontinuar, el nombre del skulptor es: Louis Dideron, Maestro Dideron. Un tipo formidavle i korajozo. Yo lo konosi kuando fui elijido al Instituto, en 1971. El savia lo ke Malraux avia echo a mi padre. Me disho: “Kero ke sepas la istoria egzakta de las skulpturas ke Andre Malraux trusho a mi atelier en Marseille, en 1924...” Me konto todo, i me lo konfirmo kon una letra eskrita.
Despues de la gerra, el eskrivano topo el remedio de vengarse de mi papa. Kreo un skandalo konsernando el tablo: LA DISEUSE DE BONNE AVENTURE del pintor George de la Tour.
La istoria de este tablo empesa ansi:
El tablo de La Tour ke estava por vender me entereso, me fui a Sarthe a 300 km de Paris para verlo. Efektivamente pude meldar la sinyatura: G. de la Tour Fecit Luneville Lothar.
Le ize saver a M. de Gastines ke estava enteresado por el tablo “Bonne Aventure” ke keriya vender. Me demando 7 miliones i medio de dolares. Me presizo ke lo iva propozar en primero al Muzeo de Louvre. “La priorita siguro es el Muzeo” le respondi. Los konservatores i shefes del Muzeo, René Huyghe, Germain Bazin, akompanyados del Presidente del Konsilio Artistiko, M. David David-Weill, un buen amigo de mi padre, lo egzaminaron:
“Vuestro tablo vale 6 milliones, ke vos ofresemos - no vale mas.”
Mi padre se desida i le dize a Gastines:
“De akordo al presio de 7 i medio. Te lo merkamos.
Unos kuantos dias despues, René Huyghe viene a muestra kaza i demanda a mi papa:
“Kererias vender el tablo a 6 miliones?
“Estash egzajerando, no? Ma esto de akordo de venderlo al presio ke lo merki. Si vos desidash, tomaldo oy mismo i no avlaremos mas de la kestion.”
Huyghe mantuvo su presio i mi padre el suyo.
El dia mismo, a la noche, David Weill telefono a mi padre i le disho:
“Tienes razon, M. Wildenstein, perfektamente. Es una kestion de prinsipio.”
Mi padre, en su egzistensia, ofresio munchas ovras al Louvre.
No son los vendedores de arte ke van a desidar del budjeto de los Muzeos de Fransia. El Louvre puedia apatronarse, ma desidio ke Georges de la Tour no era un pintor de este presio i no la priorita fondamental del patrimonio Fransez.
Sovre esto demandimos, kon mi papa, una lisensa de eksportasion por el “La Bonne Aventure”, la otorizasion de azerlo salir del territorio. Evidentemente es Germain Bazin ke lo sinyo. Era difisil de no sinyarlo - el Louvre avia refuzado de merkarlo, no una vez, ma dos vezes.
El tablo “Le Tricheur à l’As de Carreau” de la Tour, komo el tablo “La Diseuse de Bonne Aventure”, ke azen parte de la “Triolojia del Fils Prodigue” apartenia a Pierre Landry. Savemos ke M. Landry avia obtenido una lisensa por su “Tricheur”. El avia insistido durante 15 anyos para vender su tablo al Louvre. El lo keria vender solo para ekspozar su pintor preferado en el Louvre. El era amorozo de G. de La Tour.
Muestro tablo estuvo aki en Paris durante uno o dos anyos. Lo teniyamos kontra la pared. No estavamos pensando mas. Ma desidimos enfin de ekspediarlo a los Estados Unidos. Estuvo ornando muestra kaza de New York anyos i anyos, antes ke el Metropolitan lo merke por 675,000 dolares en 1960.
Era muncho mas barato ke los pintores: Le Nain o Poussin. En este mizmo tiempo el skandalo del tablo Bonne Aventure avia empesado... El Ministro de Kultura, André Malraux, lo izo su objektivo.
Al Ministerio de Kultura, André Malraux konto ke Wildenstein pago el grupo de interesados del Muzeo de Louvre para ke deshen kitar el kapo lavoro ke no puediya salir de Fransia. La kestion fue el motivo de indinyasion nasional. El malorozo Germain Bazin fue ovligado de defenderse i kontar lo djusto.
A la Kamara de Deputados, Malraux repeto ke el sertifikato de eksportasion fue sinyado antes su entrada al Ministerio. Sovre todo, el eskrivano nunka avia visto el tablo en su vida.
Mi padre lo kemaron realmente.
Ma si keresh saver lo mas interesante:
Malraux se va a New York para ver “La Bonne Aventure” en el Muzeo Metropolitan i les dize ke:
ESTUDIO ESTE PINTOR DESDE LOS ANYOS 1920.
EL TABLO KE MERKARON DE WILDENSTEIN ES FALSO.
La malisia de Malraux kontra mi padre no tenia nada de un sekreto de estado.
