“Tihle Shana Vekilelotea, Tahel Shana Uvirhotea”
Keridos Korelijionarios,
Komo ya lo savesh muy bien; kada empesijo nuevo de periodo del tiempo es tambien una okazion de dirijir a nuestro Kriador nuestros senseros dezeos, nuestras esperansas i nuestros suetos.
En estos dias ke estamos a la entrada de un anyo nuevo, me gustaria empesar a este mesaje en adresandovos la bendision apropriada a estos dias:
“Se Akave el anyo sus negatividades, empese la anyada kon sus fertilidades”.
Sigun las reglas de nuestra santa relijion Rosh Ashana no solo ke es un empesijo del periodo del kalendario, sino ke es una oportunidad de kontrolar nuestra kondukta en realizando un egzamen de konsensia i de arreglar nuestra vida konforme a los preseptos de nuestra santa Tora.
El mes de Tishri es un periodo yeno de espritualizmo i orasion ke nos da esta okazion kon “Rosh Ashana”, “Yom Kipur” i las fiastas de “Sukot”, “Shemini Atseret” i ”Simhat Tora”.
“Ayom Arat Olam, Ayom Yaamid Bamishpat”
“Es diya ke se manifesto el universo, Es diya de estar en djuzgo”
Klaro ke ya estamos bien prontos a esta atmosfera dizde un mez kon las orasiones de “Selihot” konforme a la fraza sigiente:
“Pen Zeman Yagbieha Veram Levaveha Begoveha”
“No seya ke el tiempo te ennalteska i tu korason se ezvaneska en vanidad”
No tengo dubyo ke nuestros ermanos van kompletar los preseptos de nuestra santa ley kon modestia para sersen meresientes del perdono de los sielos.
Keridos Ermanos.
Siendo una komunidad ke se esta amenguando i se esta envejesiendo komo populasion tenemos ke dirijir nuestras fondasiones i institusiones en lo mas posivle rasyonalizmo.
Me siento el dover de apoyar kon mis bendisiones a el Prezidente i a los dirijentes de nuestra komunidad ke verdadmente se estan esforsando kon abnegasion en este asunto i dezeo ke todos nuestros ermanos se adjunten kon eyos moralmente i materialmente.
Todo en aviendo entre nuestros korelijionarios:
“Ahava Veahva, Shalom Vereut/Amor i ermandad, pas i Amistad”
No deve de aver ningun dubyo ke puedemos defender i enforteser nuestra egzistensia.
El empesijo de un nuevo anyo es tambien la okazion de adresar nuestras orasiones a el Santo i Bendicho El, tambien por nuestro puevlo i nuestra patria a ke nos regale un mundo yeno de pas entre nozotros, de artura a los ambrientos i de abrigo a los desnudos.
Siendo yeno de estos pensamientos i sentimientos, sueto ke seamos meresientes de la mizerikordia del bendicho Kriador i ke alkansemos a munchos anyos kon todos nuestros keridos i serkanos kon sanedad, prosperidad i alegria.
Kon todas las bendisiones de la Santa Tora.
Tizku Leshanim Rabot
Shana Tova Umeusheret.
Rav İsak HALEVA
Gran Rabino
