Desde un largo tyempo una mizma kestyon vyene al esprito de munchas personas: Kuala es la razon de esta grande multitud de Premyos Nobel atribuidos a personas de merito de orijen ebraika?
En efekto, el kavzo es reelmente sorprendyente relativamente a la miniskula kuantidad de djudyos komparativamente al inmenso shifro de personas de otras relijyones ke egzisten sovre el globo terrestre.
Ke fueran fervyentes kreyentes o no kreyentes del todo, persekutidos o no persekutidos, uvo en la mas parte de los desendyentes de Moshe Rabenu (aun sin tyerra propya durante dos milenaryos, o puede ser al kontraryo, por la simple razon de apartener a una relijyon en egzilyo) el sentimyento de dover kada uno renforsar absolutamente sus kualidades intelektuales de observasyon ansi ke de refleksyon, kuando otros umanos de diferentes konfesyones, enfohados eyos en sus lavoros agrikolos o otros, no pensaron kon la mizma intensidad a un semejante adelantamyento.
Es ke el fakto de no tener, durante sus egzilyo, la posibilidad de okuparsen seryozamente de kualkyer lavoro agrikolo o byen ekskluzivamente manual, los pusho en direksyon de ofisyos munchas vezes manko lukrativos ma mas apropyados a sus manera de bivir i tambyen de pensar?
Las opinyones son diferentes a este sujeto… En un pasado relativamente serkano, Cecile Roth avia dicho ke los djudyos abandonaron sus aktividad agrikola desde la destruksyon de Yerushalayim i se dispersaron sovre el globo terrestre sovre baza de la dura lejislasyon ke les fue impozada por la severa ostilidad de las autoridades Kristyanas.
Esto dicho, ay de esto dos o tres semanas, meldi un artikolo muy interesante sinyado por el byen konosido filozofo Maurice Ruben Hayoun, profesor en varyas grandes universitas evropeas, el kual mos avla de un livro entitolado “Poignée d’élus” (punyado de eskojidos) sinyado de parte de dos grandes ekonomistos “Maristella Botticini” i “Zwi Eckstein”.
El selebre komentador mos ambeza ke la idea prinsipal de este livro es de meter en evidensya las razones prechizas por las kualas los djudyos se alesharon de la aktividad agrikola a la kuala eyos eran muy atados en la antikuidad, afin de konsakrarsen por la mas parte a lavoros intelektuales.
Esta tezis es diferente de la de Cecile Roth i mos indika ke muestros avuelos desde sus orijen se alesharon de la agrikultura i se esforsaron de investir toda sus enerjia i todos sus esforsos no en un kapital ke no se puede transportar tal la agrikultura, ma en un kapital umano syentifiko fasilmente transportavle komo la alfabetizasyon i la edukasyon de los ijos, al empesijo kon la Biblia i mas tadre el Talmud.
Desde antes del egzilyo, los djudyos eran ovligados de ambezar a sus ninyos a meldar i gradualmente a interpetrar la inmensa literatura Biblika komo de mezmo Talmudika tal ke es prekonizado en la Shema … “Las palavras ke te rekomendo oy, kedaran en tu korason, las vas a ambezar a tus ijos, las vas a mensyonar en syendo asentado en tu kaza, komo tambyen en kaminando ahuera de tu kaza, la noche en echandote i la manyana en despertandote”...
A diferentes epokas, la Biblia i el Talmud egzijaron del padre de ensenyar a sus ijos a meldar i eskrivir, ansi ke a nadar prekoniza el Talmud, en previzyon de una tempesta maritima ande los talmidim se puedran topar.
Maurice Ruben Ayoun mos dize tambyen ke konvensidos de esta konstatasyon, los autores del livro en kestyon afirman ke este aleshamyento de muestros ansestros de la agrikultura en favor de la syensya, fue un grande avantaje para eyos, por la simple razon ke komparativamente a los otoktonos non-djudyos del payis ande se topavan durante los dos milenaryos de peregrinasyon, la saveduria les aseguro una syerta superyoridad intelektual sovre los otros.
Para entender la importansa de esta situasyon, kale referarmos a la literatura talmudika eya mizma, la kuala mete un djenero de baryera entre los hahamim i los analfabetos.
Segun lo ke eskrive el mizmo egzejete, la segunda thezis mayor de este livro se esforsa de eksplikar de ke manera el djudaizmo manko de su Templo i de su kulto sakrifisyal, pudo devenir una relijyon ke egzija de sus partisipantes el ovligo absoluto de saver perfektamente meldar i eskrivir, egzijensya absoluta ke no egziste en las otras relijyones monoteistas.
En efekto, keridos lektores “Meldar” es entrar en un mundo munchas vezes muevo ke mos pusha a pensar i tambyen a refleshir.
En todo kavzo, kale akseptar ke estos dos milenaryos de egzilyo tan dolorozos para muestros antepasados syempre inkyetos i en estado de perpetual aprehensyon, desveloparon en eyos grandes kualidades de observasyon i de djuzgamyento ke otomatikamente eyos transmetyeron a sus desendyentes.
