El mez de Tishri no es solamente una suksesyon de fyestas, es tambien mez de orasyon i de pardon. El grande savyo Moshe Ben Maimon, (Maimonides 1135-1240) disho: “Esta perioda el umano deve ser konsiderado komo medio kulpante, medio inosente”.
En mi chikez el mez de Tishri teniya para mi una sola sinyifikasyon: fin del enveran i empesijo de las eskolas. Fue mi kerido Nono zl. ke me dyo syertas eksplikasyones i nosyones simples sovre los Moadim.Mozotros moravamos en un apartamento, de sorte ke no me akodro aver visto una Suka en muestro derredor. No kero ke ayga malentendido. Klaro ke en las Keilot se izyeron estas sukas ma, koza kuryoza, yo no esto pudyendo akodrarme.
En el anyo 1945, la Gerra terrivle ya aviya eskapado. Fue tambien el anyo ke nasyo mi ermaniko chiko. Mi kerido padre zl. Desido de trokar un poko la atmosfera de penseryos i alkilo por la sezon una kazika en la İsla de Halki. Reelmente era una buena idea porke dayinda, mas o menos estavamos todos debasho la influensa de los diyas oskuros i reselos.
Akel anyo i munchos anyos despues no uvo Keila en Halki. En los anyos 48-50 al lado de la kaza ke alkilimos, aviya una kaza grande, kaji una rezidensya kon una guerta imensa (en los ojos de una chika de 11-12 anyos). Esta kaza aparteniya a una famiya djudia. Por no azer yerro no kero dar el nombre syendo ke no esto sigura. Esta famiya onoravle, en kada anyo, en las fyestas de Tishri avriya sus kaza a la Komunidad Djudia, afin de de transformarla en Keila.
Fue en esta kaza de Halki ke konosi de serka la Suka. Myembros de la Komunidad la preparavan kon ardor, kon amor para servir durante Sukkot. Me akodro ke i yo, a mi mezura! perkurava a ayudarles. Por egzempyo arrekojiya las ojas vedres ke kayiyan de los arvoles (no mos olvidaremos ke era el Otonyo. La Suka era entornada kon pedasos de tual i karpetas finas, delgadas, en el techo de la Suka aviya ojas vedres, bastante grandes ke lo kuvriyan enteramente. Kero adjustar otrun detalyo importante ke no me olvidi. Los kreentes, kaji en kada diya komiyan en la Suka.
El otonyo del anyo 1956, fue el primer anyo ke fyestimos Rosh Hashana leshos de mis djenitores i mis ermanikos. Aviyan echo Aliya el Marso del mizmo anyo.El primer enverano ke pasimos sin eyos trokimos de kampanya, mos fuimos a Kalamısh ande biviyan los paryentes de mi marido i akel mizmo anyo (1956) en Septembre izimos un largo viyaje a Israel. Mi ijo lo ke teniya era 3 anyos, par konsekuensa no teniyamos dingun problema de eskola.
Naturalmente yo ya konosiya la sinyifikasyon de las fyestas i tambien de SİMHAT TORA. Ma, nunka lo aviya bivido yeno, yeno komo lo bivimos akel anyo, kon toda la alegriya i el entuzyazmo kolektivo. El Hatan de akel anyo era un vezino de mi famiya. A la salida del Kal, el Hatan i un grupo de akompanyadores se fueron a su kaza. Remarki ke uvo idas i venidas durante el diya entero. Mos fuimos kon mi marido a la kaza del Hatan . Mos arresivyeron kon muncha onor i avlando en Judeo-Espanyol porke i eyos eran idos de la Turkiya.
Oras de tadre mos arrekojimos sentenas en la Plasa delantre el imoble de la İriya, kere dizir la Munisipalidad de Petah-Tikva. Vide arrivar de todas las partes una muchidumbre de sivdadinos chikos, grandes djuntos kon el Hatan. Los de delantre, teniendo los SEFARİM, kantando, baylando kon alegriya. Los bayles kontinuaron asta media noche kon una orkestra improvizada.
Reelmente un rekuerdo inolvidavle. Anyada buena keridos lektores.
