Mizmo si kada vez mos esforsamos de utilizar palavras differentes para avlar de syertos problemas, es triste i provablemente sin ‘grande esperansa de mijoria’ de repetar kontinualmente las mizmas kozas; ma ay kavzos ande el silensyo devyene una kulpa.
Por seguro ke no es un muevo sujeto para ningun de los lektores, ma imposivle de no avlar de la atmosfera mundyal ke se esta de mas a mas deteryorando komo si un velo obskuro se obstina a espandirse no solo sovre terrenos ande se enfrentan fuersas enemigas kada una ostil a lo ke reprezentan la otras, ma tambyen sovre espasyos a primera vista kalmos i sin problemas insoluvles, ma ke mankan de voluntad de rezolver las difikultades de los otros.
Si, aktualmente sovre los kampos de batalya dos fuersas kontraryas se keren anihilar la una la otra, la primera en el eskopo de ovedeser a antiguos preseptos ke puede ser en un pasado leshano eran konsiderados komo syendo sakros, ma ke aktualmente se afirman sin kualkyer valor moral lo ke al pareser kontinuara un muy largo tyempo, la otra al nombre de lo ke (kon o sin razon) yamamos ‘Sivilizasyon’.
Ma en realidad, es ke ovedesemos verdaderamente a los prinsipyos de baza de la Sivilizasyon? Munchas trajedias ke se puedran probablemente evitar se pasan en muestro entorno, las deploramos por seguro sin pedrer tyempo, i mizmo envezes mos lamentamos sinseramente komo fue el kavzo (no ay de esto un largo tyempo) por el puerpo inerto de un chiko ijiko echado por las olas de la mar sovre una plaj serka de Bodrum.
En efekto, ke fue echo para ke semejantes dramas no se produzgan mas? Segun lo ke la Prensa estranjera mos ambeza, desde el empesijo del anyo 2016 asta oy, dunke en el interval de 10 mezes, aproksimativamente 3.300 emigrantes muryeron de muevo, englutidos por las olas furyozas de la mar Mediteranea, i (komo lo savemos kaji todos) la mas parte por kavza de embarkasyones medyas rotas.
Puede ser ke syertos lektores me konsideraran de una naividad primitiva (lo aksepto), munchas vezes me demando: Es ke los governos oksidentales o azyatikos entre los kualos munchos son bastante rikos, endjuntos kon la partisipasyon de las inmensas firmas komersyales muy poderozas ke yamamos “Multinasyonales” de laskualas los altos dirijentes resiven kada anyo, komo premyos de apresyasyon “sumas de moneda inkontestavlemente egzorbitantes en Euros o Dolares”, no pueden organizar un sistema de ‘Urjensya Maritima’? Es ke en este momento, egziste en el mundo una mas grande nesesidad ke de salvar vidas en estado de perdisyon? Lo ke alora sera la verdadera prova de una sivilizasyon verdadera.
Por las oras, desgrasyadamente es lo kontraryo ke enkontramos sovre el espasyo rafinado de muestro mundo por ansi dezir sivilizado. El sityo elektroniko de la reputada gazeta franseza ‘Le Nouvel Observateur’ de Martes o Myerkoles pasados mos informa ke syertas de las luksyozas sukursales de estas muy rikas multinasyonales de vestimyentas, esparsidas en las grandes sivdades de varyos payizes, al lugar de partisipar a la evolusyon edukativa de ninyos, emplean envezes ijikos de migrantes de onze o dodje anyos komo ovreros para chikos lavoros, los kualos resiven 30 dolares al mez por 12 oras al dia de aktividad.
A esta edad, es ke el lugar ande deven toparsen estas chikas kreaturas no es la eskola? Ke sera sus futuro si desde sus chikes eyos son ovligados de yevar o traer produktos de vestimyentas de un lugar al otro?
La prensa tambyen mos komunika ke en semblavles surkursales de grandes Multinasyonales de vestimyentas, mansevikos de 15 anyos son empleados para deskolorar varyas partes de bludjines kon produktos ekstremamente toksikos sin darles maskas adekuadas para sovreguardar sus respirasyon.
De otra parte un aeroplan de gerra (por inadvertensya puede ser) echo bombas sovre una eskola en Siria, kavzando ansi la muerte de nombrozos adolesentes.
Si… komo todos ya lo savemos, “defender muestros derechos” es un dover en direksyon de mozotros mizmos, ma asta la limita ande eyos no danyaran los derechos de los otros”.
Es ke el ‘ser umano’ pyedro la konsyensya de lo ke son realmente ‘el byen’ i ‘el mal’? La kestyon mos vyene munchas vezes al tino, sin syempre resivir kualkyer repuesta, o muy probablemente sin verdaderamente dezear resivir una repuesta.
